Ŝefis 16 - BIBLIA - traduson antigu in Krioulo

Sanson na Gaza

¹ Un dia Sanson bai pa Gaza, i oja la un minjer di mau vida, i bai pasa noti ku el.

² Jinti di Gaza bin obi kuma Sanson staba la; e bai taja ki kau, e pui guardas na porton di prasa na ki di noti. E fika ketu tudu ki di noti, e fala: “No na peral tok sol mansi; dipus no ta matal.”

³ Ma Sanson dita te me-noti, i lanta, i rinka porton di prasa, ku tudu si dus batenti, tudu ku ntrinku, i lambul i pui riba di ombra, i lebal te la riba di monti ku sta dianti di Ebron.

Sanson ku Dalila

⁴ Dipus de kusas, i bin gosta di un minjer comadu Dalila, ku moraba na kobon di Sorek.

⁵ Ŝefis di filisteus bai pa el, e bai falal: “Ngodal pa jubi si bu pudi sibi nunde ku si garandi forsa sta nel, pa no pudi pañal, no maral, no dominal. Kada un di nos ta dau mil i sen mueda di prata.”

⁶ Dalila fala Sanson: “Kontan nunde ku bu garandi forsa sta nel, tambi kuma ku bu pudi maradu o dominadu.”

⁷ Sanson falal: “Si N maradu ku seti nasiñu fresku ku ka seku inda, N ta fika fraku suma kualker omi.”

⁸ Ŝefis di filisteus tisi seti nasiñu fresku ku ka sekuba inda. Dalila maral ku elis.

⁹ I tenba omis ku sukundiba na si kuartu. I falal: “Sanson! Ali filisteus na bin pa bo!” I sapa ki nasiñus suma ku liña ta sapa si fugu toka nel. Asin sigridu di si forsa ka diskubridu.

¹⁰ Dalila fala Sanson: “Abo bu na fasin trosa, bu kontan mintida. Kontan gosi ke ku bu pudi maradu ku el.”

¹¹ I falal: “Si N maradu tesu ku kordas nobu ku nunka ka usadu, N ta bida fraku suma kualker omi.”

¹² Asin Dalila ranja kordas nobu, i maral ku elis, oca ku omis sukundiduba ja na si kuartu. I falal: “Sanson! Ali filisteus na bin pa bo!” I sapa kordas na si mon suma un fiu.

¹³ Dalila fala Sanson: “Te gosi bu na fasin trosa, bu kontan mintidas. Kontan kusa ku bu pudi maradu ku el.” I falal: “Si bu toma ki seti ponta di ña kabelu, bu tisil juntu ku liña di fisial, bu fiksal ku pinti, N ta bida fraku suma kualker omi.” Asin Dalila pul pa i durmi, i toma ki seti ponta di kabelu, i tisil juntu ku liña di fisial,

¹⁴ i fiksal ku pinti, i falal: “Sanson! Ali filisteus na bin pa bo!” I korda di si sonu, i rinka pinti na pontas di kabelu juntu ku liña di fisial.

¹⁵ Dalila puntal: “Kuma ku bu pudi fala kuma bu aman ma bu ka fiansa na mi? Tris bias ja bu na fasin trosa; te gosi bu ka kontan nunde ku bu forsa sta nel.”

¹⁶ Manera ki na punta-puntal tudu dia, i na ŝatial ku si palabra, Sanson fika ku garandi kasabi,

¹⁷ tok i kontal tudu si sigridu, i falal: “Nunka faka ka pasa na ña kabelu, pabia ami i nazireu, dedikadu pa Deus disna di bariga di ña mame. Si N rapadu, ña forsa na sai na mi, N na sedu fraku suma kualker omi.”

¹⁸ Oca ku Dalila oja kuma i diskubril tudu si sigridu, i manda coma ŝefis di filisteus, i fala elis: “Bo bin mas e bias, pabia i kontan ja tudu si sigridu.” Ŝefis di filisteus bin pa el, e tisi diñeru na se mon.

¹⁹ Dalila pui Sanson durmi riba di si ragas, i coma un omi ku bin rapal ki seti ponta di kabelu. Dalila kumsa na bulil, oca si forsa saiba ja nel.

²⁰ I falal: “Sanson! Ali filisteus na bin pa bo!” Sanson korda di sonu, i pensa: “N na sai suma ku N tarda ta fasi, N na libra ña kabesa.” Ma i ka sibiba kuma SIÑOR disalba ja.

²¹ Filisteus pañal, e rinkal si dus uju, e lebal pa Gaza, e maral ku dus korenti di bronzi, e pul pa i ba ta pila trigu na kalabus.

²² Ma kabelu kumsa na kirsi mas na si kabesa.

Mortu di Sanson

²³ Un dia ŝefis di filisteus junta pa fasi sakrifisiu pa se deus Dagon. E fika kontenti dianti di Dagon, e na fala: “No deus danu no inimigu Sanson na no mon.”

²⁴ Oca ku jinti ojal, e na ngababa se deus, e na kanta: “No deus danu no inimigu na no mon, kil ku ta danaba no tera, i ta mata-mataba no jinti.”

²⁵ Oca ke sta tudu kontenti, e fala: “Bo coma Sanson pa i bin fasi tiatru no dianti.” E bai coma Sanson na kalabus pa i bai fasi tiatru se dianti. E pul pa i firma na metadi di pilaris.

²⁶ Sanson fala rapas ku pegal na mon: “Leban pa ki pilaris ku nguenta e kasa, pa N pudi ngosta nelis.”

²⁷ Kasa (ku sedu baloba) i inci ku omis ku minjeris. I staba la tambi tudu ŝefis di filisteus. Na bankada di purmeru andar i staba serka di tris mil omi ku minjer, ku na jubiba Sanson i na fasi tiatru.

²⁸ Sanson coma SIÑOR i fala: “SIÑOR Deus, N pidiu pa bu lembra di mi, bu dan forsa son e bias, o Deus, pa N pudi da un pankada, N vinga filisteus pa ña dus uju.”

²⁹ Asin Sanson pega ki dus pilar di metadi ku nguentaba ki baloba, i stika kurpu na se metadi; si mon direita staba na un, si skerda staba na utru.

³⁰ I fala: “N na muri ku filisteus!” Logu i mpina ku forsa; kasa kai riba di ŝefis, riba tambi di tudu jinti ku staba la. Asin i mata jinti mas ciu na si mortu di ki kilis ki mata na si vida.

³¹ Si ermons ku tudu familia di si pape e bai tomal, e lebal, e bai nteral na koba di si pape Manoá, na metadi di Zorá ku Estaol. I mandaba na Israel pa vinti anu.