Ŝefis 14 - BIBLIA - traduson antigu in Krioulo

Kasamenti di Sanson

¹ Sanson ria pa Timnat, i oja la un minjer filisteu.

² I riba, i bai konta si pape ku si mame, i fala elis: “N oja un minjer filisteu na Timnat. Bo bai buskan el pa N kasa.”

³ Si pape ku si mame puntal: “Nta i ka ten minjer na metadi di bu parentis ku tudu no pobu? Pabia di ke ku bu na bai toma un minjer filisteu, ki jinti ku ka sirkunsidadu?” Sanson fala si pape: “Bo bai buskan el, pabia i el ku N gosta del.”

⁴ Si pape ku si mame ka sibiba kuma SIÑOR na tarbaja ne kusa, pabia i na buskaba manera di geria ku filisteus, manera ke dominaba Israel na ki tempu.

⁵ Sanson ku si pape ku mame e ria pa Timnat. Oca ki ciga na orta di uva di Timnat, un fiju di lion sai pa bin kontra ku el, i na pupa.

⁶ Spiritu di SIÑOR toma konta del ku forsa, tok i findi lion di riba pa bas, sin nada na mon, suma kin ku na findi fiju di kabra, ma i ka konta si pape nin si mame kusa ki fasi.

⁷ I bai kombersa ku ki minjer, i gosta del.

⁸ Dipus di sertu tempu i riba pa bai kasa ku el. I sai na kamiñu pa bai jubi kadaver di ki lion. Ki kadaver teneba bagera ku mel.

⁹ I tira ki mel ku si mon, i na kumel pa bai, i paña si pape ku si mame, i da elis mel; e kume. Ma i ka konta elis kuma i tiraba ki mel na kadaver di lion.

¹⁰ Si pape bai pa kau di ki minjer. Sanson fasi festa la, suma ku jovens kustuma ta fasi.

¹¹ Oca ke ojal, e tisil trinta rapas pa e sta juntu ku el.

¹² Sanson fala elis: “N na bota bos un adiviña. Si bo sertal na seti dia di kasamenti, N na da bos trinta lensol di liñu ku trinta komple.

¹³ Si bo ka pudi sertal, bo na dan trinta lensol di liñu ku trinta komple.” E falal: “Kontanu ki adiviña; no misti obil.”

¹⁴ I ruspundi elis: “Kusa di kume sai na kumedur; kusa meladu sai na kusa forti.” Te tris dia e ka pudi serta adiviña.

¹⁵ Na kuartu dia e fala minjer di Sanson: “Ngoda bu omi pa i konta adiviña pa no pudi sibil. Si i ka asin, no na kemau ku tudu familia di bu pape. Bo comanu li pa robanu no kusas, i ka asin?”

¹⁶ Minjer di Sanson bai cora si dianti, i falal: “Abo bu ka gosta di mi; bu ka ten nin amor pa mi, pabia bu da ña parentis un adiviña, nin bu ka splikan el.” I falal: “N ka konta nin ña pape nin ña mame. Nta N na bin kontau gora?”

¹⁷ I cora pa el tudu ki seti dia di festa di kasamenti. Na setimu dia i bin kontal pabia i na ŝatialba ciu. Asin i bai konta si parentis rasposta di ki adiviña.

¹⁸ Na setimu dia, antis di sol kai, omis di ki prasa punta Sanson: “Kal kusa ku mas mela di ki mel? O kal kusa ku mas forti di ki lion?” I fala elis: “Si bo ka labraba ku ña baka, nunka bo ka na sibi e adiviña.”

¹⁹ Spiritu di SIÑOR bin riba di Sanson ku forsa. I bai pa Askelon, i mata trinta omi di la, i toma se ropa, i da komples pa kilis ku splikalba ki adiviña. I paña raiba, i bai pa kasa di si pape.

²⁰ Si minjer dadu pa un rapas ku seduba kavalyeru di Sanson.