Ŝefis 12 - BIBLIA - traduson antigu in Krioulo

Jeftá geria kontra Efrain

¹ Omis di Efrain junta se tropas, e kamba riu pa Zafon, e punta Jeftá: “Pabia di ke ku bu bai geria kontra fijus di Amon, bu ka comanu pa no bai ku bo? No na kema bu kasa riba di bo.”

² Jeftá ruspundi elis: “Ami ku ña pobu no teneba purblema garandi ku fijus di Amon. N coma bos, ma bo ka bin libran na se mon.

³ Oca ku N oja kuma bo ka na libran, N pui ña vida na pirigu, N bai geria ku fijus di Amon. SIÑOR ntrega elis na ña mon. Pabia di ke ku bo bin aos pa bin geria kontra mi?”

⁴ Efraimitas fala: “Abos jileaditas bo sedu jinti ku kuri di Efrain ku Manasés.” Jeftá junta tudu omis di Jilead, i geria ku Efrain. Jileaditas ngaña elis,

⁵ e taja kambansa di Jordon. Ora ku un efraimita ku na kuri pa kapli i ciga pa kamba, omis di Jilead ta puntal: “Abo i di Efrain?” Si i fala “Nau,”

⁶ e ta falal: “Fala de, Ŝiboleti.” Ma el i ta fala “Siboleti,” pabia i ka pudi purnunsial diritu. E ta pañal, e matal na kambansa di Jordon. Na ki tempu i matadu korenta i dus mil omi di Efrain.

⁷ Jeftá, jileadita, i manda na Israel seis anu. I muri, i nteradu na si prasa di Jilead.

Ibzan, Elon ku Abdon

⁸ Dipus di Jeftá, Ibzan di Belen bin manda na Israel.

⁹ I teneba trinta fiju macu ku trinta femia. I da si trinta fiju femia kasamenti fora di si jorson; i tisi trinta bajuda di utru jorson pa si fijus macu. Ibzan manda na Israel seti anu,

¹⁰ i muri, i nteradu na Belen.

¹¹ Dipus di Ibzan, Elon, zebulonita, manda na Israel des anu.

¹² I muri, i nteradu na Aijalon na tera di Zebulon.

¹³ Dipus di Elon, Abdon, fiju di Ilel, piratonita, i bin manda na Israel.

¹⁴ I teneba korenta fiju ku trinta netu. E ta montaba riba di setenta buru. Abdon, fiju di Ilel, piratonita, i manda na Israel oitu anu,

¹⁵ i muri, i nteradu na Piraton, na tera di Efrain, na monti di un amalekita.