Ŝefis 10 - BIBLIA - traduson antigu in Krioulo

Tola ku Jair

¹ Dipus ku Abimelek muri, i lanta un omi pa libra Israel, ku sedu Tola, fiju di Pua, fiju di Dodó, di jorson di Isakar. I moraba na Samir na montaña di Efrain.

² I manda na Israel vinti i tris anu; i muri, i nteradu na Samir.

³ Dipus di Tola, i lanta Jair, omi di Jilead, ku manda na Israel vinti i dus anu.

⁴ I teneba trinta fiju ku ta montaba riba di trinta buru. E teneba trinta prasa ku sta na tera di Jilead, ku ta comadu Avot-Jair te aos.

⁵ Jair muri, i nteradu na Kamon.

Israel fika bas di filisteus ku amonitas

⁶ Fijus di Israel torna na fasi mal dianti di uju di SIÑOR, e bai adora baalins ku Astarot, ku deusis di Siria, Sidon, Moab, di fijus di Amon, ku di filisteus. E disa di adora SIÑOR.

⁷ SIÑOR paña raiba di Israel, i ntrega elis na mon di filisteus ku fijus di Amon.

⁸ Na ki mesmu anu e domina riba di fijus di Israel, e maltrata elis. Pa disoitu anu e kastiga tudu fijus di Israel ku staba na Jilead, na utru banda di riu Jordon, na tera di amoreus.

⁹ Tambi fijus di Amon kamba Jordon pa geria kontra jorsons di Judá, Benjamin ku Efrain. Asin fijus di Israel fikaba forontadu,

¹⁰ e yalsa fála e coma SIÑOR, e falal: “No peka kontra bo, pabia no disau suma no Deus, no bai na adora baalins.”

¹¹ SIÑOR fala fijus di Israel: “Nta oca ku ejipsius, amoreus, fijus di Amon, filisteus,

¹² sidonius, amalekitas ku maonitas e dominaba bos, tok bo yalsa fála pa coman, N ka libra bos na se mon?

¹³ Ma bo disan, bo bai adora utru deusis. Ami tambi N ka na libra bos mas.

¹⁴ Bo bai coma ki deusis ku bo kuji; elis e pudi libra bos na ora di foronta!”

¹⁵ Fijus di Israel fala SIÑOR: “No peka; fasinu suma ku bu misti, ma no pidiu, ten pasensa, bu libranu aos.”

¹⁶ E tira deusis strañu na se metadi, e bai na adora SIÑOR. Asin Deus ka pudi nguenta mas oja se kasabi.

¹⁷ Fijus di Amon comadu pa gera, e bai kampa na Jilead. Israelitas tambi junta, e bai kampa na Mizpá.

¹⁸ Jinti di Jilead ku se ŝefis e punta ŋutru: “Kal omi ku na kumsa geria kontra fijus di Amon? Ki algin i na sedu ŝef di tudu moraduris di Jilead.”