Ŝefis 1 - BIBLIA - traduson antigu in Krioulo

Israel geria ku kananeus ku sobra

¹ Dipus di mortu di Josué, pobu di Israel punta SIÑOR kal jorson ku na sedu purmeru pa bai geria kontra kananeus.

² SIÑOR ruspundi: “Judá ku na bai. Ali N ntrega e tera na se mon.”

³ Pobu di Judá fala pobu di Simeon, se ermons: “Bo bin ku nos pa tera ku no dadu, pa no geria kontra kananeus. Dipus no na bai ku bos pa tera ku bo dadu.” Asin simeonitas bai ku elis.

⁴ Oca ku Judá bai gera, SIÑOR ntrega kananeus ku perizeus na se mon; e mata des mil omi na Bezek.

⁵ E oja Adoni-Bezek la, e geria kontra el, e mata kananeus ku perizeus,

⁶ ma Adoni-Bezek kuri; e serkal, e prindil, e kortal dedus garandi di mon ku pe.

⁷ Adoni-Bezek fala: “Setenta rei, ku dedus garandi di mon ku pe kortadu, e ta pañaba restu di kumida bas di ña mesa. Suma ku N fasi, asin ku Deus fasin tambi.” E lebal pa Jerusalen; la ki muri.

⁸ Fijus di Judá geria kontra Jerusalen, e tomal, e mata jinti di la ku spada, e miti fugu na prasa.

⁹ Dipus, fijus di Judá vira pa sul, pa geria kontra kananeus ku moraba na montañas ku kau rasu.

¹⁰ Judá bai tambi kontra kananeus ku moraba na Ebron, ku teneba nomi di Kiriat-Arba na kumsada; e ngaña jinti di Sesai, Aiman ku Talmai.

Kaleb ngaña Debir

¹¹ Di la e bai kontra moraduris di Debir, ku ta comaduba Kiriat-Sefer.

¹² Kaleb fala: “Kin ku ngaña Kiriat-Sefer, i tomal, N na dal ña fiju Aksa pa i kasa.”

¹³ Otniel, fiju di Kenaz, ermonsiñu di Kaleb, i tomal. Asin Kaleb dal si fiju Aksa pa i kasa.

¹⁴ Oca ku Aksa bai pa el, i ngodal pa i pidi si pape un kampu. Aksa ria na buru. Kaleb puntal: “Ke ku bu ten?”

¹⁵ I ruspundil: “Fasin un fabur. Suma ku bu dan e con seku, bu ta dan tambi fontis di yagu.” Kaleb dal fontis di riba ku di bas.

¹⁶ Fijus di ki keneu, pape di minjer di Moisés, e sai na Jerikó, prasa di palmeras, ku fijus di Judá, e bai pa lala di Judá ku sta na sul di Arad; e bai mora ku pobu ku sta la.

¹⁷ Jinti di Judá bai ku jinti di Simeon, se ermons, e ngaña kananeus ku moraba na Zefat, e dana prasa tudu. E coma nomi di ki prasa Orma.

¹⁸ Judá toma Gaza, Askelon ku Ekron, ku tudu se terenus.

¹⁹ SIÑOR staba ku pobu di Judá; e tira tudu moraduris di montañas, ma e ka tira moraduris di kobon, pabia kilas e teneba karus di feru.

²⁰ Konformi ordi di Moisés, e da Kaleb Ebron. Di la i tira tris fiju di Anak.

²¹ Fijus di Benjamin ka tira jebuseus ku moraba na Jerusalen. Asin jebuseus mora ku fijus di Benjamin na Jerusalen te aos.

²² Jorsons di José bai pa Betel. SIÑOR staba ku elis.

²³ E manda spions pa ki prasa di Betel, ku teneba nomi di Luz.

²⁴ Ki spions oja un omi ku na saiba na prasa, e falal: “Si bu mostranu entrada di prasa, no ta tratau diritu.”

²⁵ Asin i mostra elis entrada di prasa; e mata tudu jinti di la ku spada, ma son ki omi ku si familia ke disa pa e bai.

²⁶ Ki omi bai pa tera di eteus, i kumpu un prasa, i comal nomi di Luz, ku sedu si nomi te aos.

²⁷ Ma jorson di Manasés ka tira moraduris di Bet-Sean, nin di Taanak, nin di Dor, nin di Ibleon, nin di Mejidu, ku tudu tabankas pertu de prasas. Kananeus pui sintidu pa fika na ki mesmu kau.

²⁸ Oca ku Israel ngaña mas forsa, e fasi kananeus se tarbajaduris, ma e ka tira elis tudu.

²⁹ Jorson di Efrain ka tira kananeus ku moraba na Jezer, ma kananeus kontinua mora na se metadi.

³⁰ Jorson di Zebulon ka tira moraduris di Kitron nin di Naalol; asin kananeus kontinua mora la ku elis, ma e pudu tarbaja pa elis.

³¹ Jorson di Aser ka tira moraduris di Ako, Sidon, Alab, Akzib, Elba, Afeka, nin di Reob,

³² ma aseritas kontinua na metadi di kananeus ku moraba na ki tera, pabia e ka tira elis.

³³ Jorson di Naftali ka tira moraduris di Bet-Semes, nin di Bet-Anat; e kontinua na metadi di kananeus ku moraba na ki tera, ma e pui elis tarbaju forsadu.

³⁴ Amoreus pinca fijus di Dan pa tras te na montañas, pabia e ka disa elis ria pa kobon.

³⁵ Amoreus tambi e pui sintidu pa fika na montañas di Eres, na Aijalon ku na Saalabin, ma oca ku jorsons di José ngaña mas forsa, e pui elis tarbaju forsadu.

³⁶ Frontera di amoreus kumsa na subida di Akrabin, i bai pa Sela; di la i bai pa dianti.