Salmus 99 - BIBLIA - traduson antigu in Krioulo

¹ SIÑOR na rena; nasons pa e tirmi! El i sinta na tronu na metadi di kirubins; tera pa i bulbuli!

² SIÑOR i garandi na Sion, i yalsadu pa i sta riba di tudu nasons.

³ E dibi di ngaba bu garandi nomi meduñu, pabia i sagradu.

⁴ Rei puderosu, bu ama justisa; bu ta firmanta retidon. Na Israel bu ta fasi kil ku sedu justu i sertu.

⁵ Bo garandisi SIÑOR no Deus, bo mpina dianti di tapeti di si pe, pabia el i santu.

⁶ Moisés ku Aron e seduba si saserdotis; Samuel seduba algin ku ta coma si nomi. E ta comaba SIÑOR, el i ta kudi elis.

⁷ I papia ku elis na kuluna di nuven; e obdisi si nsinamentus ku leis ki da elis.

⁸ O SIÑOR no Deus, bu ruspundi bu pobu; bu seduba un Deus ku ta purda elis, kontudu bu ta kastigaba mal ke fasi.

⁹ Bo garandisi SIÑOR no Deus, bo adoral na si monti sagradu, pabia SIÑOR no Deus i santu.