Salmus 98 - BIBLIA - traduson antigu in Krioulo

Salmu.

¹ Bo kanta un kantiga nobu pa SIÑOR, pabia i fasi maravilyas; Si mon direita ku si brasu santu ngañal vitoria.

² SIÑOR pui si salbason pa i kunsidu, i mostra si retidon dianti di nasons.

³ Na si bondadi ku si bardadi pa pobu di Israel, i lembra sempri di kil ki purmiti elis. Jinti di tudu parti di mundu e oja salbason di no Deus.

⁴ Bo yalsa fála ku kontentamentu pa SIÑOR, abos tudu ku mora na mundu; bo grita ku alegria, bo kontenti, bo kanta pa ngabal.

⁵ Bo kanta pa ngaba SIÑOR, ku arpa; bo toka arpa, bo kanta salmus.

⁶ Bo toka trombetas ku kornetas, bo yalsa fála ku kontentamentu dianti di SIÑOR, bo Rei.

⁷ Mar pa i somna, ku tudu ku sta nel; mundu tambi, ku tudu ku mora nel.

⁸ Rius pa e toka palmu! Montañas pa e kanta juntu ku alegria

⁹ dianti di SIÑOR, pabia i na bin pa julga mundu; i na julga mundu ku justisa; i na julga nasons ku si bardadi.