Salmus 97 - BIBLIA - traduson antigu in Krioulo

¹ SIÑOR na rena! Tera, ku manga di jiu, pa e kontenti!

² Nuvens ku sukuru na rodial; retidon ku justisa sedu alisersu di si renansa.

³ Fugu ta bai si dianti ku ta kema si inimigus na tudu ladu.

⁴ Si relampagu ta numia mundu; tera ta ojal, i ta tirmi.

⁵ Montis ta ribi suma sera dianti di SIÑOR, dianti di SIÑOR di tudu tera.

⁶ Seu ta anunsia kuma Deus i justu; tudu nasons ta oja si gloria.

⁷ Tudu jinti ku ta adora imaẑens labradu, ku ta njata na idulus ku ka bali, pa e fika kunfundidu! Abos deusis, bo mpina dianti di SIÑOR, abos tudu!

⁸ Sion obi, i fika kontenti. Prasas di Judá na sinti alegria pabia di bu julgamentus, o SIÑOR.

⁹ Abo, SIÑOR, bu sedu Deus riba di tudu mundu; bu sta muitu mas altu di ki tudu utru deusis.

¹⁰ Abos ku ama SIÑOR, bo nuju mal. El i ta guarda vida di si pobu, i ta libra elis di mon di jinti mau.

¹¹ Lus ta numia pa justus; kontentamentu ta bin pa retus di korson.

¹² Abos ku sedu justu, bo kontenti na SIÑOR, bo ngaba si nomi sagradu.