Salmus 96 - BIBLIA - traduson antigu in Krioulo

¹ Bo kanta un nobu kantiga pa SIÑOR; abos di tudu mundu, bo kanta pa SIÑOR.

² Bo kanta pa SIÑOR, bo fala ben di si nomi; bo konta di si salbason kada dia.

³ Bo diklara si gloria na metadi di nasons; bo konta tudu rasas kusas garandi ki fasi.

⁴ SIÑOR i garandi, i mersi ngabadu; i mas mersi rispitu di ki tudu deusis,

⁵ pabia tudu deusis di utru nasons e sedu idulus son, ma SIÑOR, i el ku kumpu seu.

⁶ El i un Rei gloriosu, rodiadu di garandesa; forsa ku bonitasku ta inci si kau sagradu.

⁷ Abos, familias di nasons, bo glorifika SIÑOR, bo ngaba si gloria ku si forsa.

⁸ Bo ngaba gloria di nomi di SIÑOR, bo tisi ofertas, bo bin pa si kasa.

⁹ Bo adora SIÑOR na bonitasku di si puresa. Tudu moraduris di mundu pa e tirmi si dianti.

¹⁰ Bo konta na metadi di nasons kuma SIÑOR na rena. Mundu firmantadu pa i ka pudi bulbulidu. Deus na julga nasons ku justisa.

¹¹ Abos, seu ku tera, bo kontenti! Mar pa i somna, ku tudu ku sta nel!

¹² Kampada pa i kontenti, ku tudu ku sta nel! Tudu arvuris di matu na kanta ku kontentamentu

¹³ dianti di SIÑOR, pabia i na bin, i na bin pa julga mundu. I na julga mundu ku justisa, i na julga nasons ku si bardadi.