Salmus 94 - BIBLIA - traduson antigu in Krioulo

¹ O SIÑOR, Deus di vingansa, O SIÑOR, Deus di vingansa, mostra bu lus.

² Abo ku sedu Juis di mundu, lanta, bu paga jinti orgulyosu kil ke mersi.

³ Te kal tempu, SIÑOR, te kal tempu ku jinti mau na jukuta ku kontentamentu?

⁴ Kilis ku ta fasi pekadu e ta fala kusas duru, e ta njata.

⁵ E ta kebranta bu pobu, e maltrata nason ki di bo.

⁶ E ta mata viuvas ku stranjerus; e tira vida di orfan.

⁷ E ta fala: “SIÑOR ka na oja; Deus di Jakó ka na mporta.”

⁸ Abos, brutus na metadi di pobu, bo para sintidu; abos tulus, kal dia ku bo na sedu jiru?

⁹ Nta kil ku kumpu oreja, i ka ta obi? Kil ku forma uju, i ka ta oja?

¹⁰ Kil ku ta raprindi nasons, i ka ta kastiga? Kil ku ta nsina jinti, i ka ten kuñisimentu?

¹¹ SIÑOR kunsi pensamentus di omis, i sibi kuma e sedu bakatela.

¹² SIÑOR, sortiadu i ki omi ku bu ta raprindi, kil ku bu ta nsina bu lei;

¹³ bu ta dal diskansu di dias mau, tok koba yabridu pa jinti mau.

¹⁴ SIÑOR ka na nega si pobu, i ka na bandona si yardansa.

¹⁵ Julgamentu na torna fasidu ku justisa; tudu jinti di korson retu na apoial.

¹⁶ Kin ku na sta na ña ladu kontra kilis ku ta fasi mal? Kin ku na firma ku mi kontra kilis ku ta fasi pekadu?

¹⁷ Si SIÑOR ka judanba, N na staba ja na mundu di mortu.

¹⁸ Oca N sinti kuma ña pe na lalu, bu bondadi suguran, o SIÑOR.

¹⁹ Oca ku N na kudaba ciu dimas, bu konsolan, bu dan kontentamentu.

²⁰ Nta juis kuruptu i pudi sedu bu sos? I ta fasi mal, i tursi lei pa justifikal.

²¹ Juisis kuruptu ta junta kontra justus, e kondena kilis ku ka ten kulpa, pa e muri.

²² Ma SIÑOR i ña tori forti; ña Deus i sedu roca ku N ta sta suguru nel.

²³ I na pui se propi pekadu kai riba delis, i na kaba ku elis pabia di se maldadi. SIÑOR no Deus na kaba ku elis.