Salmus 92 - BIBLIA - traduson antigu in Krioulo

Salmu, kantiga pa dia di diskansu.

¹ I bon pa ngabau, SIÑOR, pa kanta musika pa bu nomi, o Deus ku sta riba di tudu,

² pa anunsia bu bondadi parmaña, di noti pa konta manera ku bu sedu fiel.

³ I bon pa toka salteriu di des korda, pa fasi musika ku arpa,

⁴ pabia bu kontentan ku kusas ku bu fasi, SIÑOR; N na kanta ku kontentamentu pabia di tarbaju di bu mon.

⁵ SIÑOR, kusas ku bu fasi i garandi; bu pensamentus i fundu dimas.

⁶ Brutu ka ta sibi e kusa; tulu ka ta ntindil,

⁷ kuma, mesmu ku jinti mau nasi suma paja, nin si kusas na kuri diritu pa kilis ku ta fasi mal, e na kabadu ku el pa sempri.

⁸ Abo, SIÑOR, bu sedu Deus ku sta riba di tudu, pa sempri.

⁹ Bu inimigus, SIÑOR, na bardadi, bu inimigus na pirdi. Tudu jinti ku ta fasi kusas mau e na pajigadu,

¹⁰ ma bu na aumenta ña forsa suma kil di turu brabu; bu na untan ku azeiti fresku.

¹¹ Ña ujus na oja kastigu di ña inimigus; ña orejas na obi di kaida di kilis ku ta fasi mal, ku ta lanta kontra mi.

¹² Justus na lanta ku saudi suma palmera, e na kirsi suma sedru di Líbanu.

¹³ Suma ke parantadu na kasa di SIÑOR no Deus, e na kirsi la ku saudi.

¹⁴ Na se bejisa e na padi inda frutu, e na fika forti i fresku,

¹⁵ pa anunsia: “SIÑOR i retu; el i ña Roca; i ka ten injustisa nel.”