Salmus 90 - BIBLIA - traduson antigu in Krioulo

KUARTU LIBRU (Salmus 90—106)

Orason di Moisés, omi di Deus.

¹ SIÑOR, bu sedu no kau suguru disna di kumsada di mundu te gosi.

² Antis di montis bin lanta, antis di bu kumpu tera ku mundu, abo, bu sedu Deus, antis di kumsada te dipus di kabantada.

³ Bu ta pui omi pa i torna sedu reia, bu fala: “Abos omis, bo riba pa kil ku bo seduba.”

⁴ Mil anu pa bo i suma dia di aonti ku pasa, i suma ki tris ora di sirvis di di noti.

⁵ Bu ta leba omis suma korenti di yagu. E ta sedu suma suñu, o suma paja ku ta nasi mandrugada,

⁶ i ta kirsi ki parmaña; di tardi i ta lati, i seku.

⁷ Bu raiba na pantandanu dimas, i na kaba ku nos.

⁸ Bu pui no pekadu dianti di bo; no pekadu sukundidu, bu tiral na bu lus.

⁹ Tudu no dias ta pasa na sombra di bu raiba; no ta kabanta no anus ku jimi.

¹⁰ No vida ta bai te setenta anu; si no ten forsa, no pudi ciga na oitenta, ma ki anus na tisinu son kansera ku tristesa; e ta pasa dipresa; no ta bua.

¹¹ Kin ku kunsi forsa di bu raiba? Kin ku kunsi ki medu ku bu raiba pudi tisi?

¹² Nsinanu pa no fasi konta di no dias, pa no pudi ngaña korson jiru.

¹³ SIÑOR, te kal tempu? Disa, bu ten pena di bu servus.

¹⁴ Fartandanu ku bu bondadi kada dia ku sol na mansi, pa no pudi kanta ku alegria, no kontenti tudu no vida.

¹⁵ Danu kontentamentu na konta di ki dias ku bu kastiganu, di ki anus ku no oja mal.

¹⁶ Mostra bu servus kusas ku bu fasi; mostra se fijus bu gloria.

¹⁷ Fabur di SIÑOR no Deus pa i sta riba di nos! Deus ta konfirma pa nos tarbaju di no mon; sin, i ta konfirma tarbaju di no mon.