Salmus 9 - BIBLIA - traduson antigu in Krioulo

Salmu di Davi pa ŝef di musika, pa sedu kantadu ku musika di “Mortu di Fiju”.

¹ N na ngabau, SIÑOR, ku tudu ña korson, N na konta aserka di tudu bu maravilyas.

² N na kontenti, N kanta ku alegria pa bo; N na kanta pa ngaba bu nomi, Deus ku sta riba di tudu.

³ Ña inimigus rakua, oca ke ojau, e kai, e pirdi.

⁴ Bu difindi ña kasu pa N pudi ten roson; bu sinta na bu tronu, bu na julga ku justisa.

⁵ Bu raprindi nasons, bu kaba ku jinti mau; bu riska se nomi pa sempri.

⁶ Inimigus kabadu ku el di un bias; bu dana se prasas; e pirdi, tudu ku se lembransa.

⁷ SIÑOR na rena pa sempri; i firmanta si tronu pa julga.

⁸ El mesmu na julga mundu ku justisa, i na guberna nasons ku retidon.

⁹ SIÑOR i un kau suguru pa kilis ku kalkadu, un lugar forti na tempu di foronta.

¹⁰ Kilis ku kunsi bu nomi e na fiansa na bo, pabia abo, SIÑOR, nunka bu ka bandona kilis ku buskau.

¹¹ Bo kanta pa ngaba SIÑOR ku sta sintadu na Sion; bo anunsia na metadi di nasons kusas ki fasi.

¹² Kil ku ta vinga darmamentu di sangi i ta lembra, i ka ta diskisi di gritu di kilis ku foronta.

¹³ Ten pena di mi, SIÑOR! Jubi manera ku kilis ku ka gosta di mi e pun pa N sufri. Lantandan di portas di mortu,

¹⁴ pa N pudi firma na portas di pobu di Sion. N konta tudu ku N na ngabau pa el, pa N kontenti na bu salbason.

¹⁵ Nasons kai na koba ke koba; se pe prindidu na ridia ke sukundi.

¹⁶ SIÑOR i kunsidu manera ki ta fasi justisa. Jinti mau ta prindidu na kusas ke fasi ku se mon. Igaion. Sela

¹⁷ Jinti mau na botadu na mundu di mortus, ku tudu nasons ku diskisi di Deus.

¹⁸ Koitadi ka pudi diskisidu pa sempri; speransa di kilis ku foronta ka na tujidu pa sempri.

¹⁹ Lanta, SIÑOR, pa ka omi ngaña; nasons, pa e julgadu bu dianti.

²⁰ SIÑOR, pui elis medu, pa nasons sibi kuma e sedu son omis. Sela