Salmus 89 - BIBLIA - traduson antigu in Krioulo

Maskil di Etan, ezraita.

¹ N na kanta sempri bondadi di SIÑOR; ku ña boka N na pui tudu jorsons di futuru pa e sibi kuma abo i fiel.

² N na diklara kuma bu bondadi na dura pa sempri, kuma bu bardadi sta firmi suma seu.

³ Bu fala: “N fasi kontratu ku kil ku N kuji; N jurmenta pa ña servu Davi, di kuma

⁴ N na firmanta si jorson pa sempri; N fasi si tronu firmi, pa i pasa di pape pa fiju pa sempri.” Sela

⁵ O SIÑOR, seu na ngaba kusas garandi ku bu fasi, i na konta tambi, na juntamentu di bu pobu, kuma abo i fiel.

⁶ Kin ku sedu suma SIÑOR la na seu? Na metadi di anjus, kin ku parsi SIÑOR?

⁷ Deus i rispitadu ku medu na juntamentu di si pobu; tudu kilis ku sta na si roda dibi di ten medu del.

⁸ O SIÑOR, Deus ku ten tudu puder, kin ku forti suma bo? Na tudu ladu bu sedu fiel, SIÑOR.

⁹ Bu ta manda riba di turbada di mar; ora ku maron lanta, bu ta kalmal.

¹⁰ Bu molosta ki monstru Raab, bu matal. Bu pajiga bu inimigus ku mon forti.

¹¹ Seu i di bo, ku tera tambi. I abo ku kumpu mundu, ku tudu ku sta nel.

¹² Bu kumpu norti ku sul; montis di Tabor ku Ermon e ta kanta ku kontentamentu pa bu nomi.

¹³ Bu brasu ten puder; bu mon direita i forti, i yalsadu.

¹⁴ Bu renansa firma riba di retidon ku justisa; bondadi ku bardadi sta sempri bu dianti.

¹⁵ Sortiadu ki pobu ku sibi yalsa fála, e ngabau ku kontentamentu; e na yanda na bu lus, o SIÑOR.

¹⁶ Na bu nomi e na kontenti tudu dia; bu retidon na yalsa elis.

¹⁷ Abo bu sedu gloria di se forsa; pabia di bu fabur no forsa na aumentadu.

¹⁸ SIÑOR i no difesa; Deus Santu di Israel i no Rei.

¹⁹ Un dia, bu papia na vison pa bu pobu fiel, bu fala: “N da forsa pa un soldadu di koraẑen; N kuji un joven na metadi di pobu, N dal altu pusison.

²⁰ N oja Davi, ña servu; N unjil ku ña azeiti sagradu.

²¹ Ña mon na sedu firmi ku el; ña puder na fortifikal.

²² Inimigu ka na manda riba del; nin omi mau ka na kalkal.

²³ N na kebranta si inimigus si dianti; N na bati kilis ku ten odiu del.

²⁴ N na sedu bon i fiel pa el; na ña nomi si forsa na aumentadu.

²⁵ N na pui si mon riba di mar, si direita riba di rius.

²⁶ El i na coman, i fala: ‘Abo i ña Pape, ña Deus, Roca ku ta salban’

²⁷ N na dal lugar di purmeru fiju, N na pul mas altu di ki tudu reis di mundu.

²⁸ Sempri N na guarda ña bondadi pa el; ña kontratu ku el na sedu firmi.

²⁹ Sempri i na ten algin di si jorson ku na sedu rei; si renansa na tarda suma ku seu na tarda.

³⁰ “Ma si si fijus bandona ña lei, e ka yanda konformi ña regras,

³¹ si e kebra ña ordis, e ka obdisi ña mandamentus,

³² N na kastiga se pekadu ku mantampa; N na suta elis pabia di se kulpa,

³³ ma N ka na tira tudu ña bondadi na Davi, nin N ka na disa di sedu fiel.

³⁴ N ka na kebra ña kontratu, nin N ka na muda kil ku ña boka papia.

³⁵ N ka na sedu falsu pa Davi. Un bias pa sempri N jurmenta, pa ña nomi sagradu,

³⁶ kuma si jorson na tarda pa sempri, si renansa na kontinua ña dianti suma sol;

³⁷ i na firmantadu pa sempri suma lua, ki tustumuña fiel na seu.” Sela

³⁸ Ma bu nega ki rei ku bu unji, bu bandonal, bu paña raiba del.

³⁹ Bu kebra kontratu ku bu servu, bu kontamina si koroa, bu botal na con.

⁴⁰ Bu romba tudu si muras, bu dana si kuartel.

⁴¹ Tudu jinti ku pasa na kamiñu, e roba si kusas; si visiñus ta fasil trosa.

⁴² Bu aumenta forsa di mon direita di si inimigus, bu pui elis tudu pa e kontenti.

⁴³ Bu pui ponta di si spada pa i sedu moku; bu ka judal na gera.

⁴⁴ Bu kaba ku si gloria; bu bota si tronu na con.

⁴⁵ Bu pui pa i beju sedu, bu kubril ku borgoña. Sela

⁴⁶ Te kal tempu, SIÑOR? Bu na sukundi pa sempri? Te kal tempu ku bu raiba na yardi suma fugu?

⁴⁷ Lembra kuma ña dias i kurtu; bu kumpu tudu jinti pa bakatela!

⁴⁸ Kal omi ku na bibu sin i ka na oja mortu? O kin ku pudi libra si kabesa di puder di mundu di mortu? Sela

⁴⁹ SIÑOR, nunde bu bondadi ku bu tenba na tempu pasadu? Kuma di ki purmesas fiel ku bu da Davi?

⁵⁰ SIÑOR, lembra kuma bu servu kobadu mal, manera ku N sufri na ña korson trosa di tudu nasons.

⁵¹ SIÑOR, bu inimigus koba kil ku bu unji na kada pasu ki yanda.

⁵² SIÑOR dibi di ngabadu pa sempri! Amen! Amen!