Salmus 86 - BIBLIA - traduson antigu in Krioulo

Orason di Davi.

¹ Mpina bu oreja, SIÑOR, bu kudin, pabia N sta forontadu, ku falta.

² Guarda ña vida, pabia N dedikadu pa bo. O ña Deus, salba bu servu ku fiansa na bo.

³ Ten pena di mi, o SIÑOR, pabia N ta comau tudu ora.

⁴ Pui bu servu pa i kontenti, o SIÑOR, pabia ña orason na subi pa bo.

⁵ SIÑOR, abo i bon, bu sta pruntu pa purda. Bu riku na bondadi pa tudu kilis ku comau.

⁶ Sukuta ña orason, SIÑOR, bu obi ña rogu.

⁷ Na dia di ña foronta N na comau, pabia bu ta kudin.

⁸ Na metadi di deusis i ka ten utru suma bo, SIÑOR; nin un delis ka fasi tarbaju suma di bo.

⁹ Tudu nasons ku bu kumpu na bin mpina bu dianti, SIÑOR, e na glorifika bu nomi,

¹⁰ pabia i abo i garandi, bu ta fasi milagris; abo son ki Deus.

¹¹ O SIÑOR, nsinan bu kamiñu; N na yanda na bu bardadi. Pui un sintidu na ña korson: pa N rispita bu nomi.

¹² SIÑOR ña Deus, N na ngabau ku tudu ña korson; N na glorifika bu nomi pa sempri.

¹³ Bu bondadi pa mi i garandi, bu libra ña vida na kau mas fundu di mortu.

¹⁴ O SIÑOR, jinti orgulyosu lanta kontra mi; grupu di bandidus misti tiran vida. Elis e ka ta liga nada ku bo.

¹⁵ Ma abo, SIÑOR, i Deus ku ta sinti pena, ku ta mostra fabur ku pasensa, ku ten garandi bondadi ku bardadi.

¹⁶ Vira pa mi, bu ten pena di mi. Dan forsa, bu salban, pabia N sedu bu servu, suma ña mame tambi.

¹⁷ Mostran sinal di bu fabur, SIÑOR, pa kilis ku ten odiu di mi pudi fika ku borgoña ora ke oja kuma bu na judan, bu konsolan.