Salmus 85 - BIBLIA - traduson antigu in Krioulo

Salmu pa ŝef di musika, na metadi di fijus di Koré

¹ SIÑOR, bu mostra fabur pa bu tera; bu torna pui kusas kuri diritu ku Jakó.

² Bu purda kulpa di bu pobu; bu kubri tudu se pekadu. Sela

³ Ki raiba ku na yardiba na bo, bu friantal, bu disvia del.

⁴ O Deus no Salbadur, ribantanu. Bu ka staba kontenti ku nos, ma disa kila.

⁵ O bu na ten raiba kontra nos pa sempri? Bu raiba na kontinua te na jorsons ku na bin?

⁶ Nta bu ka na torna danu vida, pa bu pobu pudi kontenti na bo?

⁷ SIÑOR, mostranu bu bondadi, bu danu bu salbason.

⁸ N na sukuta ke ku SIÑOR Deus na fala; i na papia di pas pa si pobu, ku sedu si jinti sagradu, ma ka e riba mas pa tulesa de!

⁹ Sin duvida el i sta pruntu pa salba kilis ku rispital, pa gloria pudi sta na no tera.

¹⁰ Bondadi ku bardadi e junta; retidon ku pas e beẑa ŋutru.

¹¹ Bardadi na sai na con; retidon na jubi di la riba na seu.

¹² Tambi SIÑOR na da kusas bon; no con na da bon kebur.

¹³ Retidon na bai si dianti, i na purpara kamiñu pa si pe.