Salmus 84 - BIBLIA - traduson antigu in Krioulo

Salmu di fijus di Koré pa ŝef di musika, konformi Jitit

¹ O SIÑOR ku ten tudu puder, N gosta dimas di kau ku bu mora nel!

² N misti sta la! Ña korson na dismaja ku faimadesa pa N pudi sta na kasa di SIÑOR. Ku korson ku tudu ña kurpu, N na kanta ku kontentamentu pa Deus bibu.

³ SIÑOR ku ten tudu puder, ña Rei, ña Deus, te kacu pikininu i oja kau; andoriña pui niñu pa si kabesa nunde ki pudi tene si fijus, lungu di bu altaris.

⁴ Sortiadu i kilis ku mora na bu kasa; e ta ngabau sempri. Sela

⁵ Sortiadu i kilis ku se forsa sta na bo, ku ta pui sintidu pa pega na kamiñu pa monti di Sion.

⁶ Si e pasa na Kobon di Baka, e ta fasil un fonti; cuba tambi ta inci laguas.

⁷ E ta fika e na ngaña forsa pa bai, tok kada kin bai ciga dianti di Deus na Sion.

⁸ SIÑOR Deus ku ten tudu puder, sukuta ña orason; para bu oreja, o Deus di Jakó. Sela

⁹ O Deus, jubi pa no rei, bu oja ku fabur na kil ku bu unji.

¹⁰ Un dia na bu kasa i mas minjor di ki mil na utru kau. N mas misti sedu guarda di porta di kasa di ña Deus di ki mora na tendas di jinti mau.

¹¹ SIÑOR Deus i sol, i tajadera; SIÑOR ta da fabur ku gloria. I ka ta nega da kualker kusa bon pa kilis ku ta yanda na retidon.

¹² SIÑOR ku ten tudu puder, sortiadu i ki omi ku fiansa na bo.