Salmus 83 - BIBLIA - traduson antigu in Krioulo

Salmu, kantiga di Asaf

¹ O Deus, ka bu fika kaladu; ka bu tapa oreja, nin ka bu fika sin fasi nada, o Deus.

² Jubi kuma ku bu inimigus na turmenta; kilis ku ten odiu di bo e yalsa se kabesa.

³ Ku jiresa e na fasi planus kontra bu pobu, e na ruma pa fasi mal kontra kilis ku bu ta guarda.

⁴ E fala: “Bo bin, no kaba ku elis pa ka e sedu nason, pa nomi di Israel ka lembradu mas.”

⁵ E junta, e pui na un son pa forma aliansa kontra bo:

⁶ familias di Edon, ismaelitas, Moab, jorson di Agar,

⁷ Jebal, Amon, Amalek, Filistia, suma tambi moraduris di Tiru.

⁸ Asiria tambi i junta ku elis, i da si apoiu pa jorson di Lo. Sela

⁹ Fasi elis suma ku bu fasi midianitas, suma tambi ku bu fasi Sísera ku Jabin, lungu di riusiñu di Kison.

¹⁰ Elis e kabadu ku el na Endor, e bida suma strumu na con.

¹¹ Fasi se garandis suma Oreb ku Zeeb; fasi tudu se ŝefis suma Zebá ku Zalmuna,

¹² ku fala: “Bo bin no toma konta di ki tera di Deus pa i sedu no yardansa.”

¹³ O ña Deus, pajiga elis suma puera, suma paja dianti di bentu.

¹⁴ Suma fugu ku ta kema matu, o un ŝama ku ta pui montañas pa e pega fugu,

¹⁵ asin bu ta serka elis ku bu turbada, bu pantanda elis ku bu bentu forti.

¹⁶ Kubri se rostu ku kunfuson, pa e pudi rikuñisi bu nomi, SIÑOR.

¹⁷ Pui pa e fika na kunfuson ku medu pa sempri, tok e muri ku borgoña.

¹⁸ Pui pa e sibi kuma i abo son ku tene nomi di SIÑOR, bu sedu Deus ku ta rena riba di tudu mundu.