Salmus 81 - BIBLIA - traduson antigu in Krioulo

Salmu di Asaf pa ŝef di musika, konformi Jitit.

¹ Bo kanta ku kontentamentu pa Deus, ku sedu no forsa; bo yalsa fála pa ngaba Deus di Jakó.

² Bo pega na salteriu, bo toka tambriñas, bo fasi musika bonitu ku arpa ku viola.

³ Bo toka korneta pa festival, na lua nobu, tambi ora ku lua firma.

⁴ Es i regra pa Israel, i un ordi di Deus di Jakó.

⁵ I dal suma regra pa fijus di Israel oca ki sai kontra tera di Ejitu, nunde ku N obi un vos ku N ka kunsi, ku fala:

⁶ “N tira kargu na se ombras; se mon libradu di kufus.

⁷ Oca ku bu coman na foronta, N librau. N kudiu, sukundidu na turbada; N probau na yagu di Meribá. Sela

⁸ “Ña pobu, bo sukutan; N misti avisa bos. O Israel, si bo ta seta sukutan!

⁹ Ka bo tene deus strañu na bo metadi, nin ka bo mpina dianti di deus di utru tera.

¹⁰ Ami i SIÑOR bu Deus ku tirau na tera di Ejitu; yabri bu boka diritu; N ta incil.

¹¹ “Ma ña pobu ka seta obi ña palabra; Israel ka mistin.

¹² Asin N ntrega elis pa diseẑus di se korson, pa e yanda konformi se propi pensamentu.

¹³ “A! Si ña pobu ta sukutanba! Si Israel ta seta yanda na ña kamiñus,

¹⁴ N ta bati se inimigus kinti-kinti, N pui ña mon kontra kilis ku sta kontra elis!

¹⁵ Kilis ku ten odiu di SIÑOR e na ribaba tras ku medu; se kastigu na kontinuaba pa sempri.

¹⁶ Ma abos, N na daba bos ki trigu mas minjor; N na fartandaba bos ku mel ku sai na roca garandi.”