Salmus 80 - BIBLIA - traduson antigu in Krioulo

Salmu di Asaf pa ŝef di musika. Pa i kantadu ku musika di “Lirius di Kontratu”.

¹ O Deus, Bakiadur di Israel, para sintidu. Abo ku ta gia José suma karnel, ku ta sinta na metadi di kirubins, mostra bu gloria

² dianti di Efrain, Benjamin ku Manasés; disperta bu puder, bu bin salbanu.

³ O Deus, ribantanu, bu pui bu rostu pa i brilia riba di nos, pa no sedu salbu.

⁴ O SIÑOR ku ten tudu puder, te kal tempu ku bu na sta ku raiba kontra orason di bu pobu?

⁵ Kumida ku bu ta da elis i di larma; bu ta da elis manga di larmas pa e bibi.

⁶ Bu pui no visiñus pa e jusia pabia di nos; no inimigus ta fasinu trosa.

⁷ O Deus ku ten tudu puder, ribantanu, bu pui bu rostu pa i brilia riba di nos, pa no sedu salbu.

⁸ Bu tisi un pe di uva di Ejitu; bu serka utru nasons, bu parantal.

⁹ Bu limpa terenu, bu pui pa ki planta larga rais fundu; asin i inci tera.

¹⁰ I kubri montis ku si sombra; si ramus da sombra pa sedrus garandi.

¹¹ Si ramus ta distindi te na Mar Mediteraneu; si ramus nobu ta bai te na riu Eufrates.

¹² Ke ku manda bu kebra si tapada, di manera ku tudu kil ku na pasa na kamiñu e ta kuji si uvas?

¹³ Purku di matu ta bin dana-danal; limarias di matu ta bin kumel.

¹⁴ O Deus ku sta na seu, ku ten tudu puder, riba pa nos. Jubi na tera, bu oja, bu toma konta de pe di uva

¹⁵ ku bu mon direita paranta, ku si ramus ku bu fortifika pa bo.

¹⁶ I sta kortadu, i kemadu ku fugu. Si bu raprindi, bu pobu ta pirdi.

¹⁷ Bu mon pa i sta riba di omi na bu mon direita, riba di fiju di omi ku bu fortifika pa bo.

¹⁸ Asin no ka na disvia di bo; danu nobu vida; no ta coma bu nomi.

¹⁹ O SIÑOR, Deus ku ten tudu puder, ribantanu, bu pui bu rostu pa i brilia riba di nos, pa no sedu salbu.