Salmus 8 - BIBLIA - traduson antigu in Krioulo

Salmu di Davi pa ŝef di musika konformi Jitit.

¹ O SIÑOR, SIÑOR no Deus, bu nomi i garandi na tudu mundu! Bu mostra bu gloria riba di seu.

² Bu pui pikininus ku mininus di mama pa e yabri se boka, e ngabau; bu fasi asin pabia di bu inimigus, pa kalanta inimigu ku vingadur.

³ Ora ku N jubi pa seu, tarbaju di bu mon, lua ku strelas ku bu koloka na se lugar,

⁴ N ta punta: Kin ki omi, pa bu lembra del, o kin ki fiju di omi pa bu intresa del?

⁵ Bu fasil un bokadu mas pikininu di ki anjus; bu pul koroa di gloria ku onra.

⁶ Bu dal otridadi riba di kusas ku bu kumpu; bu pui tudu kusas bas di si pe:

⁷ tudu karnel ku turus, tambi ku limarias di matu,

⁸ kacus ku ta bua, pis di mar, ku tudu ku ta nada na mar.

⁹ O SIÑOR, SIÑOR no Deus, bu nomi i garandi na tudu mundu!