Salmus 79 - BIBLIA - traduson antigu in Krioulo

Salmu di Asaf

¹ O Deus, nasons yentra na tera di bu yardansa, e kontamina bu kasa sagradu, e torna Jerusalen suma muntudu di pedras.

² E da difuntus di bu servus suma kumida pa kacus ku ta bua; tambi e da karni di bu propi pobu pa limarias di matu.

³ E darma se sangi suma yagu na roda di Jerusalen; i ka ten kin ku na ntera ki mortus.

⁴ No visiñus ku sta na no roda e kobanu mal, e ri, e fasinu trosa.

⁵ SIÑOR, te kal tempu? Nta bu na ten raiba di nos pa sempri? Bu siumi na kontinua yardi suma fugu?

⁶ Darma bu raiba riba di nasons ku ka ta rikuñisiu, riba di renus ku ka ta coma bu nomi,

⁷ pabia e mata pobu di Israel, e dana se moradas.

⁸ Ka bu lembra di pekadus di no papes, pa bu pui kulpa riba di nos; janti, bu bin mostranu bu bondadi, pabia no sta disanimadu dimas.

⁹ Judanu, o Deus no Salbadur, pa gloria di bu nomi; libranu, bu purdanu no pekadus pa amor di bu nomi.

¹⁰ Kuma ku nasons na punta: “Nunde ku se Deus sta?” No dianti, pui nasons pa e sibi kuma bu ta vinga sangi di bu servus ku darmadu.

¹¹ Sukuta jimi di katibus. Konformi bu garandi puder, guarda kilis ku kondenadu pa mortu.

¹² SIÑOR, paga no visiñus seti bias mas di ki disprezu ke ferca pa bo.

¹³ Asin anos, bu pobu, karnel ku bu ta bakia, no na falau sempri obrigadu; no na kanta pa ngabau na tudu tempu ku na bin.