Salmus 78 - BIBLIA - traduson antigu in Krioulo

Maskil di Asaf

¹ Ña pobu, bo sukuta ña lei; bo para sintidu pa palabras ku N na bin konta bos.

² N na yabri boka, N papia ku komparason; N na splika kusas di sigridu di tempu antigu.

³ Kusas ku no obi, no nsinadu, ku no papes kontanu,

⁴ no ka na sukundi elis di se fijus, ma no na nsina fijus di futuru pa e ngaba SIÑOR, no konta elis di si puder ku milagris ki fasi.

⁵ I pui lei ku nsinamentu na Israel, ku sedu jorson di Jakó, i manda no papes pa e pasanta ki lei pa se fijus,

⁶ pa jinti di futuru pudi kunsil; utrus ku ka padidu inda e pudi bin lanta, e konta se fijus tambi,

⁷ pa e pui se speransa na Deus, pa ka e diskisi di kusas ku Deus fasi, ma pa e obdisi si mandamentus.

⁸ Deus ka misti pa e sedu suma se papes, jinti ntemus ku ka ta obdisi, ku ka teneba korson firmi, ku se spiritu ka seduba fiel pa Deus.

⁹ Omis di Efrain e staba yarmadu ku mansasas, ma na dia di gera e vira kosta, e kuri.

¹⁰ E ka guardaba kontratu di Deus; e nega obdisi si lei.

¹¹ E diskisi ke ki fasi, ku ki milagris ki mostra elis.

¹² I fasi milagris dianti di se papes na tera di Ejitu, na area di Zoan.

¹³ I dividi yagu di mar, i pui elis pasa; i pui yagu firma suma mura.

¹⁴ Di dia i gia elis ku nuven; duranti noti i ta gia elis ku klaridadi di fugu.

¹⁵ I findi pedra garandi na lala, i da elis yagu ciu, suma i na sai na kau fundu.

¹⁶ I yabri fonti na pedra, i pui yagu kuri suma rius.

¹⁷ Ma e kontinua na peka kontra el; la na lala e disobdisi Deus ku sta riba di tudu.

¹⁸ E fasi diskarna, e proba Deus, e fala: “Danu ki karni ku no misti!”

¹⁹ E papia kontra Deus, e punta: “Nta Deus pudi pui mesa na lala me?

²⁰ Na bardadi i suta ki pedra garandi; yagu sai, i kuri ciu suma rius. Ma i pudi danu kumida tambi, o i ranja karni pa si pobu?”

²¹ Oca ku SIÑOR obi elis, i paña raiba kontra Israel, suma fugu ku na yardi kontra el,

²² pabia e ka tenba fe na Deus, nin e ka fiaba kuma i na salba elis.

²³ Ma i da ordi pa nuvens, i yabri porta di seu,

²⁴ i pui maná pa i cubi pa jinti kume; asin i da elis kumida di seu.

²⁵ Kada un kume pon di anjus; Deus manda elis tudu kumida ke pudi kume.

²⁶ La na seu i manda bentu di saida di sol pa i supra; ku si puder i tisi bentu di sul,

²⁷ i cubi karni riba delis suma puera, ku sedu kacus ku na bua, ciu suma reia na praia.

²⁸ Deus pui ki kacus pa e kai dentru di kampamentu, na roda di se tendas.

²⁹ Asin e kume, e farta diritu, pabia i da elis kil ke faima pa el.

³⁰ Ma e ka bin kontrola se apetiti. Oca ku karni staba inda na se boka,

³¹ raiba di Deus bin riba delis. I mata omis mas forti delis, ku sedu jovens mas minjor na Israel.

³² Ma, ku tudu es, e kontinua na peka; e ka fia na milagris ku SIÑOR fasi.

³³ Asin i kaba ku se vida suma bentu, i korta se anus di repenti ku kastigu.

³⁴ Ora ki mata utrus, ki utrus ta ripindiba, e riba, e buska Deus ku mpeñu, di mandrugada.

³⁵ E ta lembraba kuma Deus i seduba se Roca, kuma Deus ku sta riba di tudu i se Libertadur.

³⁶ E ta ngabalba ku boka, ma ku lingua di mintida,

³⁷ pabia se korson ka seduba retu pa el, nin e ka seduba fiel pa si kontratu.

³⁸ Deus, ku ta ten pena, i purda se pekadu, i ka kaba ku elis. Manga di bias i domina si raiba, i ka disal pa i yardi,

³⁹ pabia i lembra kuma elis e sedu karni, suma bentu ku pasa, i ka ta riba.

⁴⁰ Manga di bias e lanta kontra el na lala, e fasil tristi.

⁴¹ Manga di bias e proba Deus, e duvida di Deus Santu di Israel.

⁴² E ka lembra di si puder, nin di dia ki kaplinti elis di inimigu,

⁴³ manera ki fasi kusas garandi ku milagris na Ejitu, na area di Zoan.

⁴⁴ I bidanta se rius sangi, tok e ka ta pudi bibi, nin na se riusiñus.

⁴⁵ I manda elis manga di moska ku ŝatia elis, ku sapus ku dana se con.

⁴⁶ I manda gamfañotis pa e kume se prudutus, pa dana se tarbaju.

⁴⁷ Ku cuba di pedra i kaba ku se pes di uva, i dana se pes di figu brabu ku cuba friu.

⁴⁸ I ntrega se bakas pa cuba di pedra, se karnel ku kabras pa relampagu.

⁴⁹ I larga forsa ku kalur di si raiba na se metadi, i bida kontra elis suma se inimigu, i manda anjus di mal.

⁵⁰ I yabri kamiñu pa si raiba; i ka libra elis di mortu, ma i ntrega elis pa duensa.

⁵¹ I mata tudu purmeru fijus na Ejitu, ku sedu purmeru frutu di forsa di familias di Kan.

⁵² I pui si pobu pa e sai, i gia elis, suma koral di karnel, pa e pasa na lala.

⁵³ I gia elis ku suguransa; e ka medi; ma mar bin kubri se inimigus.

⁵⁴ I leba elis pa frontera di se tera sagradu, te na monti ku si mon direita ngañaba.

⁵⁵ I tira nasons fora, konformi Israel na marŝa dianti; i rapati se con, i da si pobu pa yardansa. I pui jorsons di Israel sinta na se tendas.

⁵⁶ Ma e proba Deus ku sta riba di tudu, e lanta kontra el, e ka obdisi si mandamentus.

⁵⁷ E riba tras suma ku se papes fasiba; e ka sedu fiel; e bida suma mansasa ku tene difeitu, ku ka sedu di fiansa.

⁵⁸ E lantanda si raiba ku se kaus altu di ronia; e disperta si siumi ku se imaẑens labradu.

⁵⁹ Deus obi elis, i paña raiba; i nega Israel un bias.

⁶⁰ I bandona si tenda na Siló, ki tenda ki moraba nel na metadi di jinti.

⁶¹ I ntrega arka di kontratu pa i lebadu prezu na mon di inimigus, ki arka ku sedu sinal di si forsa ku gloria.

⁶² I paña raiba kontra si yardansa, ku sedu si pobu; i ntrega elis pa e matadu ku spada.

⁶³ Fugu kaba ku se jovens; se bajudas ka teneba kantigas di kasamenti.

⁶⁴ Se saserdotis matadu ku spada; se viuvas ka pudiba cora pa elis.

⁶⁵ SIÑOR disperta suma algin ku disperta di sonu, suma omi forti ku staba kinti ku biñu.

⁶⁶ I pinca si inimigus pa tras, i pui elis na borgoña pa sempri.

⁶⁷ Fora di kila, i nega familia di José; i ka kuji jorson di Efrain,

⁶⁸ ma i kuji jorson di Judá, ku monti di Sion, ki ama.

⁶⁹ I kumpu si kau sagradu suma montañas kumpridu, suma tera ki firmanta pa sempri.

⁷⁰ I kuji Davi, si servu, i tiral di koral

⁷¹ nunde ki ta bakiaba karnel, i lebal pa i sedu bakiadur di Jakó, si pobu, ku sedu Israel, si yardansa.

⁷² Asin ki bakia elis, konformi retidon di si korson; si mon gia elis ku jitu.