Salmus 77 - BIBLIA - traduson antigu in Krioulo

Salmu di Asaf pa ŝef di musika. Pa Jedutun.

¹ N yalsa fála, N coma Deus pa i judan; i mpina oreja pa obin.

² Na dia di ña foronta, N buska SIÑOR; N yalsa mon di noti, sin kansa, ma N ka sinti konsoladu.

³ N bin lembra di Deus, N fika N na jimi; N dita N pensa, N mas fika disanimadu.

⁴ I tuji ña uju fica; N fika tarpajadu tok N ka pudi papia.

⁵ N lembra di dias di antigamenti, di anus ku pasa disna.

⁶ Di noti N bin lembra di ña kantigas; N pensa dentru di mi; na ña spiritu N punta:

⁷ “Nta SIÑOR neganu pa sempri? I ka na torna mostranu fabur?

⁸ Si bondadi para janan? Ki purmesa ki fasi, i nuladu pa sempri?

⁹ Deus diskisi di ten pena di nos? O raiba pul pa i ka mostra si amor?” Sela

¹⁰ Dipus N fala: “Kusa ku mas ta den i es: Mon direita di kil ku sta riba di tudu i ka ten ja forsa.”

¹¹ SIÑOR, N na lembra di kusas ku bu fasi. Sin, N na lembra di bu milagris di tempu antigu.

¹² N na pensa na tudu bu tarbaju, N na papia aserka di kusas ku bu fasi.

¹³ O Deus, bu kamiñu i puru; kal deus ki garandi suma no Deus?

¹⁴ Abo i ki Deus ku ta fasi milagris; bu pui nasons pa e sibi di bu puder.

¹⁵ Ku bu mon bu liberta bu pobu, ku sedu fijus di Jakó ku José. Sela

¹⁶ O Deus, oca ku yagu ojau, i kumsa na tirmi; kau fundu di mar bulbuli.

¹⁷ Nuvens kargadu e darma se yagu; seu fasi si baruju; bu fleŝas di relampagu e kuri di un ladu pa utru.

¹⁸ Baruju di bu turbada obidu na ar; relampagu numia mundu; con balansa, i tirmi.

¹⁹ Bu pega kamiñu ku pasa na mar; bu yanda na metadi di yagu fundu, ma sinal di bu pe ka ojadu.

²⁰ Bu gia bu pobu, suma karnel, pa mon di Moisés ku Aron.