Salmus 76 - BIBLIA - traduson antigu in Krioulo

Salmu, kantiga di Asaf pa ŝef di musika, ku instrumentus di musika.

¹ Deus i kunsidu na Judá; si nomi i garandi na Israel.

² Si tenda sta na Salen; i mora na Sion.

³ La ki kebra fleŝas di mansasa, tajadera, spada, ku utru instrumentus di gera. Sela

⁴ Bu ten gloria ku puder, mas di ki montañas ku tene manga di limaria.

⁵ Tropas di koraẑen e robadu se kusas; e dita e na durmi na se sonu; nin un di ki soldadus forti ka pudi lantanda si mon.

⁶ O Deus di Jakó, si bu raprindi, kabalus ku montiaduris ta kai na sonu fundu.

⁷ I abo son ki meduñu; si bu paña raiba, kin ku pudi firma bu dianti?

⁸ Di seu bu anunsia disison di bu julgamentu; mundu sinti medu, i keta

⁹ oca ku bu lanta pa julga, pa libra tudu mansus na mundu. Sela

¹⁰ Bu pudi usa te raiba di omi pa pui jinti ngabau; raiba ku sobra, bu ta maral.

¹¹ Bo fasi purmesas, bo kumpril pa SIÑOR bo Deus; nasons ku sta na roda pa e tisi pursentis pa kil ke dibi di medi.

¹² I ta kebra spiritu di ŝefis; reis di mundu ta ten medu del.