Salmus 75 - BIBLIA - traduson antigu in Krioulo

Salmu, kantiga di Asaf pa ŝef di musika. Pa sedu kantadu ku musika di “Ka bu dana”.

¹ O Deus, no falau obrigadu, no ngabau pabia kusas garandi ku bu fasi e ta tisi bu nomi pertu.

² Bu fala: “N marka un tempu pa julgamentu; N na julga ku justisa.

³ Mundu ku tudu si moraduris na bulbulidu, ma ami, N na fortifika si firkijas. Sela

⁴ Pa kilis ku ta ngaba se kabesa, N fala: ‘Ka bo njata.’ Pa jinti mau N fala: ‘Ka bo ronka forsa.

⁵ Ka bo njata na bo forsa ku orgulyu, nin ka bo papia ku kabesa yalsadu.’ ”

⁶ Puder di garandisi algin ka ta bin di saida di sol, nin di si kaida, ku fadi di lala,

⁷ ma Deus ki Juis; i ta baŝa utru, i yalsa utru.

⁸ SIÑOR tene kopu na si mon ku inci ku biñu misturadu, ku na sukuma; i ta da jinti pa e bibi; jinti mau di mundu ta bibil ku tudu si bitbit.

⁹ Ma ami, N na anunsia sempri, N na kanta pa ngaba Deus di Jakó.

¹⁰ N na kebra tudu forsa di jinti mau, ma forsa di justus na yalsadu.