Salmus 74 - BIBLIA - traduson antigu in Krioulo

Maskil di Asaf

¹ O Deus, ke ku manda bu negan pa sempri? Pabia di ke ku bu raiba na yardi kontra karnel di bu koral?

² Lembra di bu pobu ku bu kumpra disna di tempu antigu, ku bu libra di katiberasku pa i sedu bu yardansa; lembra di monti di Sion nunde ku bu moraba.

³ Pasa na metadi de kau ku dana-danadu, bu jubi tudu mal ku inimigu fasi na kau sagradu.

⁴ Bu inimigus na grita na metadi di lugar di juntamentu; e yalsa se banderas suma sinal.

⁵ E parsi ku omis ku bai ku mancadu pa limpa kamiñu na matu ficadu.

⁶ E bai ku mancadus ku tarsadus, e korta-korta ki madera di paredi ku labraduba bonitu.

⁷ E pui fugu na bu kau sagradu, e kontamina kasa ku tene bu nomi, e batil te na con.

⁸ E fala na se sintidu: “No na kaba ku elis di un bias.” E kema tudu kaus sagradu na tera nunde ku Deus ta adoradu.

⁹ Gosi no ka ta oja sinal; i ka ten ja anunsiadur, nin algin na no metadi ku sibi te kal tempu ku e kusa na tarda.

¹⁰ O Deus, te kal tempu ku inimigu na fasiu trosa? Nta i na ba ta koba bu nomi pa sempri?

¹¹ Ke ku manda bu tuji bu mon direita tarbaja? Tira mon na bolsu, bu kaba ku elis.

¹² O Deus, abo i ña Rei disna di tempu antigu, bu sedu Salbadur di mundu.

¹³ Abo, ku bu forsa, bu dividi mar; bu kebra kabesas di serpentis di yagu.

¹⁴ Bu sapa-sapa kabesas di Leviatan, bu fasil pa i sedu kumida pa limarias di lala.

¹⁵ Bu yabri fontis ku riusiñus, bu sekusi rius ku ta kuriba ku forsa.

¹⁶ Di dia ku di noti i di bo; bu pui lua ku sol na se lugar.

¹⁷ Bu fiksa tudu fronteras di mundu, bu fasi tempu seku ku di cuba.

¹⁸ O SIÑOR, lembra kuma inimigu lebsiu; jinti tulu e fala mal di bu nomi.

¹⁹ Ka bu ntrega bu pumba pa limarias brabu; ka bu diskisi pa sempri di vida di bu pobu ku na sufri.

²⁰ Pensa na bu kontratu, pabia violensia inci tudu kau sukuru di tera.

²¹ Ka bu disa kil ku kalkadu pa i riba tras ku borgoña; koitadis ku kilis ku ten falta, pa e ngaba bu nomi.

²² O Deus, lanta, bu difindi bu propi kasu; lembra kuma ku tulus na fasiu trosa tudu dia.

²³ Ka bu diskisi di gritaria di bu inimigus; jumbulumani di kilis ku ta lanta kontra bo i na buri kada bias mas.