Salmus 73 - BIBLIA - traduson antigu in Krioulo

TERSERU LIBRU (Salmus 73—89)

Salmu di Asaf

¹ Na bardadi, Deus i bon pa Israel, pa kilis ku tene korson limpu.

² Ami, ña pe mistiba lalu; i faltaba puku pa N disvia,

³ pabia N tenba nveẑa di jinti mau ku na njata, oca ku N nota kuma ku kusas na kuri elis diritu.

⁴ E ka tene lutas; e tene bon saudi ku forsa.

⁵ E ka ta ojadu na sufrimentu suma utru jinti, nin e ka ta pasa kasabi suma utrus.

⁶ Asin e ta faja ku orgulyu suma fiu di garganti; e ta bisti violensia suma kamisa di ronku.

⁷ Se ujus inca pabia di gurdura; se kabesa inci ku manga di planu mau.

⁸ E ta fasi trosa, e ta papia mal. Na se orgulyu e ta fala di kalka jinti.

⁹ E ta papia mal kontra Deus; se lingua ta toka na tudu mundu.

¹⁰ Asin se jinti ta riba pa elis, e ta nguli tudu se palabras.

¹¹ E ta punta: “Kuma ku Deus na sibi? Nta kil ku sta riba di tudu i ten kuñisimentu?”

¹² Asin ku jinti mau ta sta; e ta sinti sempri suguru, se rikesas ta aumenta.

¹³ Na bardadi, i ka baliba pena pa N purifika ña korson, pa N laba ña mon sin kulpa,

¹⁴ pabia N ta sufri tudu ora, kada parmaña N ta kastigadu.

¹⁵ Si N papiaba palabras suma es, N na seduba falsu pa bu fijus.

¹⁶ N pui sintidu pa N pudi ntindi e kusa, ma N ojal pisadu dimas pa mi.

¹⁷ Ma oca ku N yentra na kau sagradu di Deus, N bin ntindi kal ki na sedu kabantada di jinti mau.

¹⁸ Na bardadi, bu ta pui elis na lugaris ku ta lalu, bu ta bota elis na kau di danu.

¹⁹ Di repenti e ta kai na kastigu; e ta kabadu ku el na un manera meduñu.

²⁰ Suma ku algin ta fasi ku un suñu, dipus ki korda, asin, o SIÑOR, ora ku bu korda, bu na njuti elis.

²¹ Oca ku ña korson fika kasabi, N sinti dur dentru di mi,

²² N ka tenba juisu; N ka sibiba nada; N seduba suma limaria bu dianti.

²³ Ma N sta sempri ku bo, bu pegan na mon direita.

²⁴ Bu ta gian ku bu konsiju; dipus bu na risibin ku gloria.

²⁵ Nta kin ku N tene na seu ku ka sedu abo? Li na tera i ka ten algin ku N dija fora di bo.

²⁶ Ña kurpu ku ña korson pudi fraksi, ma Deus i sedu forsa di ña korson, ku ña yardansa pa sempri.

²⁷ Kilis ku lunjusi di bo e na pirdi; bu ta kaba ku tudu kilis ku ka sedu fiel, ku disvia di bo.

²⁸ Ma pa mi, i bon pa N pertu Deus. N pui ña fiansa na SIÑOR Deus; N na anunsia tudu kusas ki fasi.