Salmus 72 - BIBLIA - traduson antigu in Krioulo

Salmu di orason pa Salomon

¹ O Deus, nsina rei pa i julga ku bu retidon; dal bu propi justisa.

² Bu pobu, ku kilis ku kalkadu, i na julga elis ku justisa.

³ Montis ku montisiñus na tisi sabura ku justisa pa pobu.

⁴ Rei na difindi kilis di pobu ku foronta, i salba fijus di kilis ku ten falta, i kastiga kilis ku ta kalka pobu.

⁵ Jinti na rispitau nkuantu sol ku lua ten, pa tudu tempu ku na bin.

⁶ Rei na sedu suma cuba ku na kai na lugar ku kebradu ja, suma cuba ku ta bin i bai, i regua con.

⁷ Na si tempu, jinti justu na ngaña forsa; i na ten manga di sabura nkuantu lua ten.

⁸ I na manda di un mar pa utru, di Riu Eufrates te na parti mas lunju di mundu.

⁹ Moraduris di lala na mpina si dianti; si inimigus na limbi reia.

¹⁰ Reis di Spaña ku jius, ku reis di Arabia ku Etiopia, e na tisi pursentis pa dal.

¹¹ Tudu reis na mpina si dianti; tudu nasons na sirbil.

¹² I na juda kilis ku comal pabia e ten falta, ku algin forontadu ku ka tene kin ku na judal.

¹³ I na sinti pena di koitadi ku fraku; i na salba vida di kil ku ten falta.

¹⁴ I na kaplinti elis di kilis ku na kalka elis ku violensia, pabia se vida ten balur si dianti.

¹⁵ Rei pa i bibu pa sempri! Pa i dadu uru di Arabia; pa jinti ora pa el sempri, pa e pidi benson pa el tudu dia.

¹⁶ Pa i ten manga di trigu na tera riba di kabesa di montis. Plantas pa e balansa bonitu suma na Líbanu; jinti di prasa pa e ciu suma paja di matu.

¹⁷ Si nomi pa i kontinua pa sempri; pa i pasantadu di papes pa fijus nkuantu sol na yardi. Jinti na bensuadu pabia del; tudu nasons na comal sortiadu.

¹⁸ SIÑOR Deus, Deus di Israel, i mersi ngabadu; i el son ku ta fasi kusas garandi.

¹⁹ Si nomi gloriosu pa i ngabadu pa sempri; si gloria pa i inci tudu mundu! Amen! Amen!

²⁰ Es i kabantada di orasons di Davi, fiju di Jesé.