Salmus 71 - BIBLIA - traduson antigu in Krioulo

¹ SIÑOR, N fiansa na bo; ka bu disan pasa borgoña.

² Manera ku bu sedu justu, libran, bu kaplintin; mpina bu oreja pa mi, bu salban.

³ Ba ta sedu ña roca suguru nunde ku N pudi bai sempri. Da ordi pa N sedu salbu, pabia abo i ña roca, ña kau forti.

⁴ Ña Deus, libran di jinti mau, di puder di omis injustu, kruel.

⁵ SIÑOR Deus, abo i ña speransa; bu sedu ña fiansa disna di ocan rapas.

⁶ Disna ku N padidu, N nkuña na bo; i abo ku tiran na bariga di ña mame. N na ngabau sempri.

⁷ Pa manga di jinti N sedu un sinal, ma abo, bu sedu ña kau forti di suguransa.

⁸ Ku ña boka N ta ngabau, N ta konta di bu gloria tudu dia.

⁹ Ka bu negan na bejisa, nin ka bu bandonan ora ku ña forsa na kaba.

¹⁰ Ña inimigus ta papia kontra mi; kilis ku na pera pa tiran vida e ta junta pa fasi planu.

¹¹ E ta fala: “Deus bandonal; bo serkal, bo pañal, pabia i ka ten kin ku na libral.”

¹² O Deus, ka bu lunjusi di mi; ña Deus, janti pa sakuran!

¹³ Kilis ku sta kontra mi pa e kunfundidu, e kabadu ku el. Kilis ku na buska fasin mal, pa e kubridu ku trosa ku kunfuson.

¹⁴ Ma ami, N na ten speransa sempri, N na ngabau kada bias mas.

¹⁵ N na konta kuma ku bu sedu justu; N na fala di bu salbason tudu ora, nin si i mas di ki kil ku N ntindi.

¹⁶ N na sai pa konta kusas di puder ku bu fasi, SIÑOR Deus; N na anunsia kuma abo i justu, abo son.

¹⁷ O Deus, bu nsinan disna di ocan rapas; te aos N ta diklara kusas garandi ku bu fasi.

¹⁸ Gosi, suma ku N beju, ku kabelu branku, ka bu bandonan, o Deus, tok N konta bu forsa ku puder pa jorson ku na lanta na futuru.

¹⁹ O Deus, bu retidon ta ciga na seu; bu fasi garandi kusas. O Deus, kin ku sedu suma bo?

²⁰ Bu pun pa N oja manga di kasabi ku mal, ma bu na torna dan vida, bu na tiran na koba di mortu.

²¹ Bu na buri ña garandesa, bu fortifikan di nobu.

²² N na ngabau ku salteriu pabia di bu bardadi, o ña Deus. N na kanta pa ngabau ku arpa, o Deus Santu di Israel.

²³ N na grita ku kontentamentu, ora ku N kanta salmus pa bo ku ña korson, pabia bu libran.

²⁴ Tudu dia N na papia di bu retidon, pabia kilis ku mistiba fasin mal e pasa borgoña ku kunfuson.