Salmus 68 - BIBLIA - traduson antigu in Krioulo

Salmu, kantiga di Davi pa ŝef di musika.

¹ Pa Deus lanta; si inimigus pa e pajigadu; kilis ku ten odiu del pa e kuri si dianti.

² Pa Deus supra elis suma ku bentu ta leba fumu, Jinti mau pa e pirdi dianti di Deus, suma ku sera ta ribi dianti di fugu.

³ Justus pa e kontenti, e kanta dianti di Deus, e jukuta ku alegria.

⁴ Bo kanta pa Deus, bo kanta pa ngaba si nomi; bo garandisi kil ku ta yanda di kabalu riba di nuvens; bo kanta ku kontentamentu si dianti; si nomi i SIÑOR.

⁵ Deus, na si kau sagradu, i sedu pape di orfan, i ta difindi viuvas.

⁶ Deus ta fasi algin dingidu pa i mora na familia; i ta tira prezus di kalabus; e ta sai tudu kontenti, ma disobdientis na mora na tera seku.

⁷ O Deus! Oca ku bu sai dianti di bu pobu, bu marŝa, bu pasa na lala, Sela

⁸ con tirmi; seu darma cuba dianti di Deus. Monti Sinai tirmi dianti di Deus, Deus di Israel.

⁹ O Deus, bu manda manga di cuba, bu regua tera di bu yardansa, ku staba kansadu.

¹⁰ Bu pobu bai sinta la; na bu bondadi, o Deus, bu da koitadi ke ki pirsisa del.

¹¹ SIÑOR da palabra; un garandi grupu di jinti bai anunsia bon noba, e fala:

¹² “Reis ku se tropas na kuri kinti-kinti; kilis ku fika na kasa na rapati kusas ku robadu, ku sedu:

¹³ asas di pumba kubridu ku prata, ku si penas kubridu ku uru ku na lampra. Kuma ku bo fika bo dita na metadi di karnel?”

¹⁴ Oca ku Deus ku ten tudu puder pajiga ki reis, i seduba suma tempu ku nevi ta kai na Zalmon.

¹⁵ Monti di Basan i monti garandi, i monti ku tene manga di kabesa.

¹⁶ Abo, monti di manga di kabesa, ke ku manda bu na jubi ku nveẑa ki monti ku Deus kuji pa sta nel, nunde ku SIÑOR na mora pa sempri?

¹⁷ Ku si manga di milyaris di karu, SIÑOR na bin di Sinai pa kau sagradu.

¹⁸ Bu subi na kau altu, bu leba manga di katibu ku bo; bu risibi ofertas di omis, mesmu di disobdientis, pa abo, SIÑOR Deus, bu pudi mora la.

¹⁹ SIÑOR dibi di ngabadu, Deus no Salbadur, ku ta leba no kargu kada dia. Sela

²⁰ No Deus i Deus ku ta salba; no libertason di mortu sta na mon di SIÑOR Deus.

²¹ Na bardadi, Deus na kebra kabesa di si inimigus, ku tene manga di kabelu, ku sedu kilis ku pega na se kulpas.

²² SIÑOR fala: “N na ribanta elis di Basan; N na pui elis pa e riba di fundu di mar,

²³ pa bu pe pudi murguja na sangi di bu inimigus; te lingua di bu kacur pudi miti nel.”

²⁴ O Deus, bu marŝa sagradu ciga ja na vista, ki marŝa di Deus ña Rei pa kasa sagradu.

²⁵ Kantaduris sta dianti, tokaduris di instrumentus na bin tras; bajudas na toka tambriñas na se metadi.

²⁶ Bo papia ben di Deus na bo juntamentu, bo ngaba SIÑOR, abos ku sedu jorson di Israel.

²⁷ Ala Benjamin na bin purmeru, ki jorson pikininu; dipus, ŝefis di Judá ku se grupu. Ala ŝefis di Zebulon ku Naftali.

²⁸ O Deus, coma bu puder, ki puder ku bu usaba pa judanu.

²⁹ Pabia di bu kau sagradu na Jerusalen, reis na tisiu pursentis.

³⁰ Raprindi ki limaria brabu ku sta na paja di riu, ki nasons ku sta suma manga di turu ku se fijus, tok e umilya, e tisiu se prata. Pajiga nasons ku ta kontenti ku gera.

³¹ Mbaŝaduris na bin di Ejitu; Etiopia na janti pa distindi mon pa Deus.

³² Abos, renus di mundu, bo kanta pa Deus; bo kanta pa ngaba SIÑOR, Sela

³³ kil ku ta yanda di kabalu riba di seu, ki seu antigu. Bo obi kuma ki ta papia ku vos forti, suma turbada.

³⁴ Bo anunsia puder di Deus; si puder di renansa sta riba di Israel; si garandi forsa sta na seu.

³⁵ O Deus, abo i meduñu na bu kau sagradu! Deus di Israel ta da forsa ku puder pa si pobu. Deus mersi ngabadu!