Salmus 65 - BIBLIA - traduson antigu in Krioulo

Salmu, kantiga di Davi pa ŝef di musika.

¹ O Deus, lovor na perau na Sion; no na kumpri no purmesas pa bo.

² Abo ku ta obi orason, tudu jinti na bin pa bo.

³ Pekadus ngaña riba di nos, ma bu ranja manera di purda mal ku no fasi.

⁴ Sortiadu i kil ku bu kuji, bu tisi pa i sta na bu kau sagradu; no na kontenti ku bondadi di bu kasa, ku sedu bu templu sagradu.

⁵ Bu ta ruspundinu ku kusas meduñu ku bu fasi ku retidon, o Deus di no salbason. Abo i speransa di jinti di tudu parti di mundu, ku kilis ku sta lunju, riba di mar.

⁶ Bu bisti forsa, bu fiksa montañas na se lugar, ku puder.

⁷ Bu ta kalma baruju di mar, ku turmenta di maron, ku jumbulumani di jinti.

⁸ Kilis ku mora na kau lunju e ten medu di kusas garandi ku bu fasi. Si sol mansi o i na kai, bu ta pui elis kanta ku alegria.

⁹ Bu ta toma konta di con, bu regual; bu ta fasil riku dimas. Rius di Deus inci ku yagu pa da jinti trigu. Asin ku bu ta fasi.

¹⁰ Bu ta inci reguas di yagu, bu ta nivela parti di riba; bu ta fasi con moli ku cuba, bu ta bensua plantas nobu.

¹¹ Anu ta kaba ku kebur ciu pabia di bu bondadi. Tudu kau ku bu yanda, rikesa ta ten la.

¹² Kau di bakia inci paja; montis bisti kontentamentu.

¹³ Matu inci karnel; kobon bisti trigu; e ku manda jinti kontenti, e kanta.