Salmus 64 - BIBLIA - traduson antigu in Krioulo

Salmu di Davi pa ŝef di musika.

¹ O Deus, obi ña vos ora ku N pui ña keŝa. N ten medu di inimigu; salba ña vida.

² Sukundin di jinti mau ku na fasi planus na sigridu, tambi di baruju di kilis ku ta fasi pekadu,

³ ku ta mola se lingua suma spada, e ponta se palabras malgos suma fleŝa.

⁴ E ta sukundi, e manda se palabras pa algin justu, di repenti, sin medu.

⁵ E ta pega tesu na mau planu, e ta fala aserka di manera di sukundi se armadilia, e ta punta ŋutru: “Kin ku na ojal?”

⁶ E ta fasi planus di maldadi, e fala: “No ranja planu pa un krimi pirfitu!” Pensamentu ku korson di omi, ningin ka pudi ntindil te na fundu.

⁷ Ma Deus na manda si fleŝa kontra elis; di repenti e na pañadu.

⁸ Deus na pui se palabras pa e kai riba di se propi kabesa. Tudu kilis ku oja elis na balansa kabesa.

⁹ Tudu omis na ten medu, e na anunsia tarbaju di Deus, e na pensa diritu na kil ku Deus fasi.

¹⁰ Algin justu na kontenti na SIÑOR, i na fiansa nel. Tudu retus di korson na ngabal.