Salmus 63 - BIBLIA - traduson antigu in Krioulo

Salmu di Davi oca ki staba na lala di Judá.

¹ O Deus, abo i ña Deus; N na lanta sedu pa buskau. N tene sedi di bo; ña kurpu dijau ciu na un tera seku, kansadu, ku ka tene yagu,

² pa N pudi oja bu forsa ku gloria suma ku N ojau na kau sagradu.

³ Bu bondadi i minjor di ki vida; e ku manda ña boka na ngabau.

⁴ Nkuantu N sta bibu, N na fala ben di bo; N na yalsa mon pa bu nomi.

⁵ Ña alma farta, suma algin ku farta kumida gurdu; asin ña boka na ngabau ku kontentamentu

⁶ ora ku N lembra di bo na ña kama, o N pensa na bo duranti noti.

⁷ Suma ku bu sedu ña ajuda, N na kanta ku kontentamentu, suguru na sombra di bu asas.

⁸ N ta pega na bo; bu mon direita ta nguentan.

⁹ Kilis ku na buska ña vida pa kaba ku el e na bai pa mundu di mortu.

¹⁰ E na matadu ku spada; e na sedu kumida pa kacur brabu.

¹¹ Ma rei na bin kontenti ku Deus. Kin ku jurmenta na nomi di Deus i na ngabal, ma boka di munturus na tapadu.