Salmus 62 - BIBLIA - traduson antigu in Krioulo

Salmu di Davi pa ŝef di musika. Pa Jedutun.

¹ N na pera ku pasensa pa Deus; son el ku pudi salban.

² El son ku sedu ña roca, ña salbason; i sedu ña kau forti; nunka N ka na bulbulidu.

³ Te kal tempu ku abos tudu bo na ataka un omi pa batil, ku sedu suma paredi ku jingi, o suma tapada ku sta pruntu pa kai?

⁴ E na fasi planu son pa batil na si kau di rispitu. E ta kontenti ku mintida, e ta bensua ku boka, ma dentru delis e ta maldisua. Sela

⁵ Ña alma, pera ku pasensa pa Deus; i son nel ku ña speransa sta.

⁶ El son ku sedu ña roca, ña salbason; i sedu ña kau forti; N ka na bulbulidu.

⁷ Ña salbason ku onra dipindi di Deus; el i ña roca forti, ña kau suguru.

⁸ Ña pobu, bo fiansa nel sempri, bo kontal tudu ku sta na bo korson. Deus i no kau di suguransa. Sela.

⁹ Omis di katigoria bas e ka sedu nada; kilis di altu katigoria e fufu. Elis tudu juntu, si e pesadu na balansu, e ta ojadu mas lebi di ki bentu.

¹⁰ Ka bo fiansa na splorason, nin ka bo njata na kusas ku furtadu. Si bo rikesas aumenta, ka bo pui sintidu nel.

¹¹ Deus papia un bias; ami N obi dus kusa: kuma puder pertensi Deus;

¹² tambi, bondadi pertensil. Abo, SIÑOR, bu na bin paga kada kin konformi kil ki fasi.