Salmus 6 - BIBLIA - traduson antigu in Krioulo

Salmu di Davi pa ŝef di musika, ku instrumentus di korda, konformi Seminit.

¹ SIÑOR, ka bu raprindin, nin ka bu kastigan na bu raiba.

² SIÑOR, ten pena di mi, pabia N na sinti fraku. Kuran, SIÑOR, pabia ña os na ñemen.

³ Dentru di mi N sta turmentadu; ma abo, SIÑOR, te kal tempu?

⁴ Riba, SIÑOR, bu libran; salban pabia di bu bondadi.

⁵ Na mortu, ningin ka ta lembra di bo; kal algin ku ta ngabau na koba ki nteradu nel?

⁶ N kansa ja ku jimi! Tudu noti N ta cora, tok kama na lagua ku ña larmas.

⁷ Ña uju sta fraku ku tristesa; i torna beju pabia di tudu ña inimigus.

⁸ Bo lunjusi di mi, abos tudu ku ta fasi mal, pabia SIÑOR obi vos di ña miskiñu.

⁹ SIÑOR obi ña pididu, i na seta ña orason.

¹⁰ Tudu ña inimigus pa e fika ku borgoña ku kunfuson, pa e riba tras, tarpajadu di repenti.