Salmus 58 - BIBLIA - traduson antigu in Krioulo

Miktan di Davi pa ŝef di musika. Pa i kantadu ku musika di “Ka bu dana”.

¹ Abos juisis, N na punta bos: Bo ta papia bardadi na justisa? Bo ta julga tudu jinti ku retidon?

² Nau! Bo ta pensa son na maldadi ku bo pudi fasi; bo mon ta buri violensia na tera.

³ Jinti mau ta disvia desdi bariga di se mame; e padidu son, e kumsa na yanda mal, e konta mintida.

⁴ E tene venenu suma di kobra; e surdu suma tutu ku tapa si oreja

⁵ pa ka obi musika di nkantadur, pa mas jitu ku kila ten na nkantamentu.

⁶ O Deus, kebra elis dintis na boka; SIÑOR, kebra keŝada di ki lions.

⁷ Pui pa e disparsi suma yagu ku na mingua; ora ke yarma se fleŝas, pa e kebra padas padas.

⁸ Fasi elis suma bicu ku ta ribi; tuji elis oja sol, suma mininu ku padidu mortu.

⁹ E na rabatadu, suma urdumuñu leba elis, kinti-kinti, antis di bo panelas sinti kalur di po di fidida, verdi o seku, ku sta bas del.

¹⁰ Justus na kontenti ora ke oja vingansa; e na laba se pe na sangi di omi mau.

¹¹ Jinti na fala: “Na bardadi, justu ten si pagamentu; sin duvida i ten un Deus ku ta julga mundu.”