Salmus 52 - BIBLIA - traduson antigu in Krioulo

Maskil di Davi pa ŝef di musika, oca ku ki edomeu, Doeg, konta Saul kuma Davi baiba kasa di Aimelek (1 Sam 22.9-10).

¹ Omi di forsa, ke ku manda bu na njata na maldadi? Bondadi di Deus ta tarda pa sempri.

² Bu ta fasi planus pa dana; bu lingua i suma faka ku moladu. Abo i fonti di nganu;

³ bu gosta di mal mas di ki ben; bu mas misti papia mintida di ki bardadi. Sela

⁴ Abo munturus, bu gosta di palabras ku ta dana!

⁵ Deus na kaba ku bo pa sempri; i na rabatau, i rastau di bu kau, i rinkau na tera di jinti bibu. Sela

⁶ Jinti justu e na bin oja ki kusa, e na medi; dipus e na ril, e fala:

⁷ “Jubi omi ku ka fasiba Deus si kau forti, ma i fiansaba na si manga di rikesa; i tornaba forti pabia di si maldadi.”

⁸ Ma ami, N sedu suma olivera ku na kirsi na kasa di Deus; N fiansa na bondadi di Deus pa tudu sempri.

⁹ Na pursensa di bu pobu N na falau obrigadu pa sempri, pabia di kil ku bu fasi. N na pui ña speransa na bu nomi pabia i bon. Maskil di Davi pa ŝef di musika konformi Maalat.