Salmus 51 - BIBLIA - traduson antigu in Krioulo

Salmu di Davi pa ŝef di musika, oca ku anunsiadur Natan bin pa el, dipus ku Davi kai na pekadu ku Bateseba (2 Sam 11—12)

¹ Ten pena di mi, o Deus, konformi bu bondadi; Suma ku bu amor i garandi, riska ki mal ku N fasi.

² Laba tudu ña maldadi, bu limpa ña pekadu.

³ N rapara mal ku N fasi, ña pekadu sta sempri ña dianti.

⁴ I kontra bo ku N peka, i son kontra bo; N fasi kil ki mau bu dianti. Asin bu ten tudu roson ora ku bu papia, bu julgan.

⁵ N seduba ja mau oca ku N formadu na bariga; Ña mame padin ku pekadu.

⁶ Bu ta kontenti ku bardadi na korson, bu ta inci ña kabesa ku jiresa.

⁷ Limpan ña pekadu ku isopi; N ta fika limpu; laban, N ta fika mas branku di ki nevi.

⁸ Fasin pa N obi gritus di kontentamentu ku alegria, pa os ku bu kebra pudi baja.

⁹ Sukundi bu rostu di ña pekadus; bu riska tudu ña maldadi.

¹⁰ O Deus, kria na mi un korson puru; arnoba dentru di mi un spiritu retu.

¹¹ Ka bu serkan bu dianti, nin ka bu tira bu Spiritu Santu na mi.

¹² Tornan alegria di bu salbason; Dan un spiritu pruntu ku na nguentan.

¹³ Asin N na nsina bu kamiñus pa jinti ku ta fasi mal; elis e na konverti pa bo.

¹⁴ O Deus, libran di pekadu di darma sangi, Deus di ña salbason. Asin ña boka na ngabau pabia abo i justu.

¹⁵ Yabri ña boka, SIÑOR; N ta ngabau.

¹⁶ Bu ka misti sakrifisius; si bu mistilba, N ta tisiu el. Bu ka ta kontenti ku ofertas kemadu.

¹⁷ Ña sakrifisiu pa Deus i un spiritu kebrantadu. O Deus, bu ka na njuti un korson kebrantadu ku ripindi.

¹⁸ Fasi ben pa Sion, konformi bu bon vontadi; kumpu muras di Jerusalen.

¹⁹ Dipus bu na kontenti ku sakrifisius ku ta dadu konformi lei, ku ofertas ntidu kemadu; jinti na pursenta bakas riba di bu altar.