Salmus 50 - BIBLIA - traduson antigu in Krioulo

Salmu di Asaf.

¹ SIÑOR, Deus ku ten tudu puder, i papia, i coma tudu mundu, desdi saida di sol te na si kaida.

² Deus na numia di Sion, ki prasa pirfitu na si bonitasku.

³ No Deus na bin; i ka na bin kaladu. Fugu ku ta kaba ku tudu i na bai si dianti; i na ten garandi turmenta na roda del.

⁴ I ta coma seu la riba, ku tera, ora ki na julga si pobu, i fala:

⁵ “Bo junta ña pobu fiel, kilis ku pursenta sakrifisiu oca ke na fasi kontratu ku mi.”

⁶ Seu na anunsia kuma Deus i justu; i el propi ku sedu Juis. Sela

⁷ “Ña pobu, sukuta; ami N na papia. O Israel, N na testifika kontra bo, ami Deus, bu Deus.

⁸ N ka na raprindiu pabia di bu sakrifisius nin bu ofertas kemadu ku sta sempri ña dianti.

⁹ N ka pirsisa di bakasiñu di bu kasa, nin kabra macu di bu koral,

¹⁰ pabia tudu limarias di matu i di mi, ku kilis ku sta riba di milyaris di montañas.

¹¹ N kunsi tudu kacus di montis; tudu limarias brabu ku sta na matu i di mi.

¹² “Si N teneba fomi, N ka ta kontau, pabia mundu ku tudu ku sta nel i di mi.

¹³ Nta ami N ta kume karni di turu? O N ta bibi sangi di kabra macu?

¹⁴ Pursenta Deus bu sakrifisiu di gardisimentu; kumpri bu purmesa pa Deus ku sta riba di tudu.

¹⁵ Coman na dia di foronta; N na librau; bu na glorifikan.”

¹⁶ Ma pa omi mau, Deus punta: “Kal diritu ku bu ten pa ripiti ña leis, o pa toma palabra di ña kontratu na bu boka?

¹⁷ Bu ka misti pa N nsinau; bu ta bota ña palabra bu tras.

¹⁸ Ora ku bu oja ladron, bu ta junta ku el; kilis ku ta kai cai, bu ta fasi sos ku elis.

¹⁹ Bu ta larga bu boka pa i papia mal; bu ta pui bu lingua na nganu.

²⁰ Bu ta sinta pa papia kontra bu ermon; bu ta disfama fiju di bu mame.

²¹ Bu fasi e kusas; ami N kala. Bu pensa kuma N sedu suma bo. Ma gosi N na raprindiu; N na pui e kusas tudu klaru bo dianti.

²² “Abos ku ta diskisi di mi, Deus, bo pensa ne kusas, pa bo ka bin sapa-sapadu, sin algin pa libra bos.

²³ Kil ku ta pursenta sakrifisiu di gardisimentu i ta glorifikan. Kil ku ta yanda diritu na kamiñu, N na mostral ña salbason.”