Salmus 49 - BIBLIA - traduson antigu in Krioulo

Salmu pa ŝef di musika na metadi di fijus di Koré.

¹ Abos, tudu nasons, bo sukuta; abos, tudu moraduris di mundu, bo para sintidu,

² umildis ku garandis, rikus ku koitadis.

³ Ña boka na papia palabras di jiresa; kusas fundu ku N na pensa nel e na da ntindimentu.

⁴ N na para oreja pa un ditu; N na splika si sintidu ku arpa.

⁵ Kuma ku N na ten medu di dia di pirigu, ora ku jinti ku misti pañan tajan ku se maldadi,

⁶ ku sedu kilis ku fiansa na kusas ke tene, ku ta njata na se manga di rikesa?

⁷ Na bardadi, ningin ka pudi kaplinti si ermon, nin i ka pudi paga Deus pres di si libertason,

⁸ pabia pres di un vida i karu dimas; tudu ki pudi paga i ka ta ciga

⁹ pa ki algin tene vida pa sempri, pa si kurpu ka bin podri.

¹⁰ No pudi oja kuma jinti jiru ta muri, suma ku tulu ta muri, ku kil ku ka ten juisu; e ta disa se rikesa pa utru jinti.

¹¹ E pensaba kuma se kasas ka na dana, kuma se jorson na mora nelis pa sempri; e ta da se terenus se propi nomis.

¹² Ma omi, ku tudu si garandesa, i ka ta fika pa sempri; i sta suma limaria ku ta muri.

¹³ Asin ki na sedu ku kilis ku ta fiansa na se kabesa, ku kilis ku bai se tras, e seta na se palabra. Sela

¹⁴ E na bai pa mundu di mortus suma karnel; mortu na sedu se bakiadur. Jinti retu na ten forsa riba delis. Se bonitasku na bin podri na mundu di mortus, lunju di se moradas.

¹⁵ Ma Deus na kaplintin di puder di mortu, i na risibin na si kau. Sela

¹⁶ Ka bu fika ku kasabi ora ku algin na torna riku, garandesa di si kasa na buri,

¹⁷ pabia, ora ki na muri, nada i ka na leba, nin si garandesa ka na kumpañal.

¹⁸ Nin ki pensa kuma el i sortiadu na si vida, manera ku jinti ta ngabal pabia kusas na kuril diritu,

¹⁹ i na bai junta ku jorson di si papes, ku ka na oja klaridadi.

²⁰ Omi ku tene garandesa sin ntindimentu i suma limaria ku ta muri.