Salmus 48 - BIBLIA - traduson antigu in Krioulo

Un kantiga; salmu pa fijus di Koré.

¹ SIÑOR i garandi, i mersi ngabadu, na prasa di no Deus, na si monti sagradu.

² Monti di Sion, prasa di garandi Rei, i bonitu, i altu, alegria di tudu mundu; i sta na ladu di norti.

³ Na si palasius Deus i kunsidu suma kau altu di suguransa.

⁴ Jubi kuma ku reis ruma, e bai junta.

⁵ E oja Sion, e fika dimiradu; e inci ku medu, e kuri kinti-kinti.

⁶ E kumsa na tirmi ku forsa, e sinti dur suma minjer na partu.

⁷ Bu kebranta elis, suma ku bentu di saida di sol ta kebra barkus di Tarsis.

⁸ Suma ku no obi, asin ku no oja na prasa di SIÑOR ku ten tudu puder, ku sedu prasa di no Deus. Deus na firmantal suguru pa sempri. Sela

⁹ Dentru di bu kasa, o Deus, no ta lembra di bu bondadi.

¹⁰ Suma ku bu nomi i garandi, asin ku bu fama ta yangasa tudu parti di mundu. Bu mon direita ta guberna ku justisa.

¹¹ Monti di Sion, tudu ku prasas di Judá, e na fika kontenti pabia di bu julgamentus.

¹² Bo yanda na roda di Sion, na tudu ladu; bo fasi konta di si toris;

¹³ bo jubi diritu pa si muras, bo nota pa si kaus forti, pa bo pudi konta jorson ku na bin.

¹⁴ E Deus i no Deus pa sempri; el i na sedu no gia te na mortu.