Salmus 47 - BIBLIA - traduson antigu in Krioulo

Salmu pa ŝef di musika na metadi di fijus di Koré.

¹ Abos, tudu nasons, bo toka palmu, bo kanta risu pa Deus ku kontentamentu!

² SIÑOR ku sta riba di tudu i meduñu, i sedu garandi Rei riba di tudu mundu.

³ I na pui pa no manda riba di rasas; i na pui nasons bas di no pe.

⁴ I kuji pa nos ki tera ku no yarda, ku sedu gloria di Jakó, kil ki ama. Sela

⁵ Oca ku SIÑOR Deus subi pa riba, jinti grita ku kontentamentu, kornetas tokadu.

⁶ Bo kanta pa ngaba Deus, bo ngabal ku salmus; bo kanta pa ngaba no Rei, bo ngabal ku salmus;

⁷ Deus i Rei di tudu mundu; bo ngabal ku kantigas di armonia.

⁸ Deus sinta na si tronu sagradu, i na rena riba di nasons.

⁹ Ŝefis di nasons e junta pa sedu pobu di Deus di Abraon, pabia reis di mundu e sedu di Deus; el i sta na kau altu, riba di tudu.