Salmus 45 - BIBLIA - traduson antigu in Krioulo

Kantiga di kasamenti, pa ŝef di musika, na metadi di fijus di Koré. Pa sedu kantadu ku musika di “Lirius”. Un maskil.

¹ Palabras bonitu na inci ña kabesa tok i darma, nkuantu N na ripiti e kantiga ku N fasi pa rei. Suma kaneta di algin ku ten jitu na skirbi, asin ku ña lingua sta pruntu ku poesia.

² Abo i mas bonitu di ki tudu omi; palabras bonitu ta darma na bu boka, pabia Deus bensuau pa sempri.

³ O rei forti, mara bu spada; bisti bu gloria ku puder di rei.

⁴ Monta kabalu, bu sai suma rei pa ngaña vitoria, pa difindi bardadi, mansesa ku retidon. Bu mon direita na fasi kusas garandi, meduñu.

⁵ Bu fleŝas gudu na yentra na korson di inimigus di rei; nasons na kai bas di bo.

⁶ O Deus, bu tronu na kontinua pa sempri; na bu renansa bu ta guberna ku justisa.

⁷ Bu ama kil ki bon; bu odia kil ki mau. E ku manda Deus, ku sedu bu Deus, i unjiu ku azeiti di kontentamentu; i dau lugar riba di bu kumpañeris.

⁸ Tudu bu ropa tene purfumu di mira, aloés ku kasia. Di palasius di marfin i ta sai musika di korda pa kontentau.

⁹ Fijus femia di reis e ta ojadu na metadi di minjeris di rispitu na bu kau; na bu mon direita i sta bu noiva, ku fajadu ku uru finu di Ofir.

¹⁰ Ña fiju, noiva di rei, sukuta, bu para sintidu: Diskisi di bu pobu, ku kasa di bu pape.

¹¹ Rei na dija bu bonitasku; dal rispitu pabia el i bu siñor.

¹² Pobu di Tiru na tisiu pursentis; omis riku na tenta ngaña bu fabur.

¹³ Fiju femia di rei sta na si palasiu; jubi kuma ki bonitu! Si bistidu tisidu ku liña di uru.

¹⁴ I na lebadu pa rei ku bistidu bordadu; bajudas na kumpañal, e na lebal pa bo.

¹⁵ E na lebadu ku alegria ku kontentamentu; e na yentra na palasiu di rei.

¹⁶ Bu na tene fijus pa toma lugar di bu papes; bu na pui elis pa e sedu ŝefis na tudu parti di tera.

¹⁷ N na pui bu nomi pa i lembradu na jorsons di futuru; asin nasons na ngabau pa tudu sempri.