Salmus 44 - BIBLIA - traduson antigu in Krioulo

Un maskil pa ŝef di musika na metadi di fijus di Koré.

¹ O Deus, no obi ku no propi oreja, no papes kontanu kusas ku bu fasi na se tempu, na dias di antigu.

² Ku bu mon bu serka nasons, bu kastiga elis, bu firmanta no papes na tera, bu fasi elis kirsi.

³ E ka ngaña tera ku se spada, nin i ka forsa di se mon ku da elis vitoria; ma i bu mon direita ku bu forsa, ku lus di bu rostu, pabia bu kontenti ku elis.

⁴ O Deus, abo i ña Rei. Da bu ordi, pa Jakó pudi tene vitoria.

⁵ Ku bu ajuda no na ngaña no inimigus; na bu nomi no na masa kilis ku lanta kontra nos.

⁶ N ka fiansa na ña mansasa; i ka ña spada ku na salban,

⁷ ma abo, bu salbanu di no inimigus; kilis ku sta kontra nos, bu kubri elis ku borgoña.

⁸ No na njata na Deus tudu ora; no na ngaba bu nomi pa sempri. Sela

⁹ Ma gosi bu neganu, bu punu na borgoña; bu ka ta sai ku no tropas.

¹⁰ Bu punu no kuri di inimigu; kilis ku sta kontra nos e roba no rikesa.

¹¹ Bu ntreganu suma karnel ku na matadu, bu pajiganu na metadi di nasons.

¹² Bu bindi bu pobu kuas pa nada; bu ka ngaña nada na se pres.

¹³ Bu pui pa no visiñus njutinu; kilis ku sta na no roda e ta ri, e fasinu trosa.

¹⁴ Bu punu suma ditu na metadi di nasons; e na balansa kabesa pa nos.

¹⁵ Ña kunfuson sta sempri ña dianti; ña rostu kubri ku borgoña

¹⁶ pabia di palabras di kilis ku na koban, e fasin trosa, tambi pabia di inimigu ku misti vinga.

¹⁷ Es tudu bin riba di nos, kontudu no ka diskisi di bo, nin no ka seduba falsu pa bu kontratu.

¹⁸ No korson ka riba tras, nin no pe ka disvia di bu kamiñu,

¹⁹ ma bu kebrantanu na kau di kacur brabu, bu kubrinu ku sombra di mortu.

²⁰ Si kontra no diskisiba di nomi di no Deus, o no para no mon pa un deus strañu,

²¹ sertamenti Deus na sibilba, suma i kunsi sigridus di korson.

²² Pa amor di bo no sta na pirigu di mortu tudu dia; no na parsintidu suma karnel ku na bai matadu.

²³ Disperta, SIÑOR! Ke ku manda bu na durmi? Korda! Ka bu neganu pa sempri.

²⁴ Ke ku manda bu na sukundi bu rostu, bu diskisi di no kasabi ku foronta?

²⁵ No sta batidu te na reia; no kurpu dita na con.

²⁶ Lanta pa sakuranu; kaplintinu pabia di bu bondadi.