Salmus 42 - BIBLIA - traduson antigu in Krioulo

SUGUNDU LIBRU (Salmus 42—72)

Un maskil pa ŝef di musika na metadi di fijus di Koré.

¹ Suma ku gazela ta faima pa korentis di yagu, asin ku N ta faima pa bo, o Deus.

² N tene sedi di Deus, ki Deus bibu. Kal tempu ku N na yentra pa pursenta dianti di Deus?

³ Ña larmas sedu ña kumida di dia ku di noti. Jinti na puntan tudu ora: “Nunde ku bu Deus sta?”

⁴ N ta sinti ña korson na kebra ora ku N lembra manera ku N ta baiba ku manga di jinti pa kasa di Deus, oca ku N ta kantaba ku kontentamentu pa ngaba Deus, na metadi di manga di jinti ku na baiba festival.

⁵ Ña alma, ke ku manda bu sta disanimadu? Pabia di ke ku bu sta tarpajadu dentru di mi? Pui bu speransa na Deus, pabia N na torna ngabal; kil ku sedu ña Salbadur.

⁶ O ña Deus, N sinti disanimadu dentru di mi; asin N na lembra di bo, nin si N sta na tera di Jordon, na monti di Ermon o na montisiñu di Mizar.

⁷ Fundura di tristesa na coma utru fundura na baruju di kaidas di bu yagu; tudu bu ondas ku maron pasa riba di mi.

⁸ Ma SIÑOR na mostran si bondadi di dia; di noti si kantiga sta na mi, ku sedu orason pa Deus di ña vida.

⁹ N na punta Deus, ña Roca: “Ke ku manda bu diskisi di mi? Pabia di ke ku N na yanda ku miskiñu pabia ña inimigu na kalkan?”

¹⁰ Palabras mau di ña inimigus ta den suma caga na os; e ta puntan tudu ora: “Nunde ku bu Deus sta nel?”

¹¹ Ña alma, ke ku manda bu sta disanimadu? Pabia di ke ku bu sta tarpajadu dentru di mi? Pui bu speransa na Deus, pabia N na torna ngabal, kil ku sedu ña Salbadur, ña Deus.