Salmus 41 - BIBLIA - traduson antigu in Krioulo

Salmu di Davi pa ŝef di musika.

¹ Sortiadu i kil ku ta pensa na koitadis; SIÑOR na libral na dia di foronta.

² SIÑOR na toma konta del, i guardal ku vida; i ka na ntregal pa vontadi di si inimigus.

³ SIÑOR na judal ora ki dita duenti; i na kural si duensa, i lantandal na kama.

⁴ N fala: “SIÑOR, N peka kontra bo; ten pena di mi, bu kuran.”

⁵ Ña inimigus ta fala mal di mi, e punta: “Kal dia ki na muri, pa si nomi pirdi?”

⁶ Kilis ku ta bin visitan, e ta papia palabras na nada. E na nota tudu kusas mau na mi; ora ke sai e na papia-papia del.

⁷ Tudu jinti ku ka gosta di mi e na ŋuniŋuni kontra mi; e na kuda kusa mas pior, e fala:

⁸ “I paña un duensa mau; kama ki dita nel, i ka na torna lanta.”

⁹ Te ña amigu di korson, ku N fiansaba nel, ku ta kume ña kumida, i rabida kontra mi.

¹⁰ Ma abo, SIÑOR, ten pena di mi, bu lantandan, pa N pudi paga elis ke ke mersi.

¹¹ N sibi kuma bu sta kontenti ku mi, pabia ña inimigu ka ta ngañan.

¹² Manera ku N ta yanda na bardadi, bu ta suguran, bu pun bu dianti pa sempri.

¹³ SIÑOR Deus di Israel, pa i ngabadu, tudu tempu, pa sempri. Amen! Amen!