Salmus 4 - BIBLIA - traduson antigu in Krioulo

Salmu di Davi pa ŝef di musika, ku instrumentus di korda.

¹ O Deus, ku ta difindi pa mi, kudin ora ku N na comau. Oca ku jinti pertan, bu dan diskansu; ten pena di mi, bu obi ña orason.

² Abos, te kal tempu ku bo na torna ña gloria na borgoña? Te kal tempu ku bo na ama kusa ku ka bali nada, bo bai tras di mintida? Sela

³ Bo lembra kuma SIÑOR kuji justu pa el. SIÑOR ta obin ora ku N comal.

⁴ Si bo paña raiba, ka bo peka. Bo papia ku bo kabesa na kama, bo fika ketu. Sela

⁵ Bo pursenta sakrifisius sertu, bo fiansa na SIÑOR.

⁶ Manga di jinti ta punta: “Kin ku na mostranu kusas bon?” SIÑOR, numianu ku lus di bu rostu.

⁷ Bu inci ña korson ku kontentamentu mas di ki elis, ora ke tene fartura di arus ku biñu.

⁸ N na dita, N durmi ku pas, pabia i abo son, SIÑOR, ku fasin pa N mora suguru.