Salmus 39 - BIBLIA - traduson antigu in Krioulo

Salmu di Davi pa ŝef di musika. Pa Jedutun.

¹ N fala kuma N na toma sintidu ku ke ku N na fasi pa N ka peka ku lingua. N na mara ña boka nkuantu omi mau sta ku mi.

² N fika kaladu suma mudu; nin ben N ka papia, ma ña dur buri.

³ Ña korson na kemaba dentru di mi; oca ku N na pensa, fugu na yardi, tok N kumsa na papia. N fala:

⁴ “SIÑOR, kontan dia ku ña vida na kaba. Kantu dias ku N sobra ku el inda? Pun pa N sibi kuma ña vida pudi kaba kinti-kinti.”

⁵ N sibi kuma bu fasi ña dias suma kumprimentu di palmu di mon; tempu di ña vida i suma nada bu dianti. Na bardadi, tudu omi, pa mas firmi ki sedu, i son bentu. Sela

⁶ I ta yanda suma sombra, i ta turmenta amonton. I ta junta rikesas sin sibi kin ku na bin tenel.

⁷ Gosi, SIÑOR, ke ku N na pera? Ña speransa sta na bo.

⁸ Libran di tudu ña krimis; ka bu disa tulus fasin trosa.

⁹ N fika mudu, N ka na yabri ña boka, pabia i abo ku fasi es.

¹⁰ Tira bu kastigu riba di mi; pabia di bu suti N na dismaja.

¹¹ Bu ta raprindi algin, bu kastigal pabia di pekadu; bu ta dana si rikesa suma bagabaga. Asin, tudu omi i suma bentu. Sela

¹² SIÑOR, obi ña orason; sukutan ora ku N na yalsa ña fála. Ka bu kala dianti di ña larmas, pabia N sedu suma ospri na bu kau, stranjeru suma ku tudu ña papes seduba.

¹³ Tira bu uju na mi, pa N pudi diskansa un bokadu, antis di N bai, N disa di izisti.