Salmus 38 - BIBLIA - traduson antigu in Krioulo

Salmu di Davi di miskiñu.

¹ O SIÑOR, ka bu raprindin na bu raiba, nin ka bu kastigan.

² Bu fleŝas pañan, bu mon kai riba di mi.

³ Pabia di bu raiba, i ka ten parti di ña kurpu ku tene saudi; ña os ka ten forsa pabia di ña pekadu.

⁴ Ña kulpa kai riba di ña kabesa suma kargu pisadu dimas pa N pudi nguental.

⁵ Ña cagas na cera mal, e sta ja podri, pabia di ña tulesa.

⁶ N sta wuŋidu, N batidu dimas, N na yanda tudu dia N na miskiña.

⁷ Ña kosta na yardi; i ka ten parti di ña kurpu ku tene saudi.

⁸ N sta fraku, N kebrantadu; N ta jimi pabia N ka ten susegu na ña korson.

⁹ SIÑOR, tudu ña diseẑu sta bu dianti; ña jimi ka sta sukundidu di bo.

¹⁰ Ña korson na bati risu; ña forsa kaba. Lus di ña uju sukuru ja ku mi.

¹¹ Ña amigus ku kumpañeris ta fika lunju di ña caga; ña parentis tambi e ta lunjusi di mi.

¹² Tudu kilis ku na buska matan e ta yarma armadilia kontra mi; kilis ku misti fasin mal e ta papia palabra di venenu; e ka ta para fasi planu mau.

¹³ Ma ami, suma surdu, N ka ta obi; N sta suma mudu ku ka pudi yabri boka.

¹⁴ Asin, N sta suma omi ku ka pudi obi, ku ka tene rasposta na si boka.

¹⁵ SIÑOR, N pui ña speransa na bo; bu na kudin, o SIÑOR ña Deus,

¹⁶ pabia N fala: “Ka bu disa elis e ŋuminin, nin pa e gozan ora ku ña pe lalu.”

¹⁷ N sta pruntu pa kai; ña dur sempri N tenel.

¹⁸ N na konfesa ña kulpa; N sta tarpajadu pabia di ña pekadu.

¹⁹ Ña inimigus tene vida ku forsa; kilis ku ten odiu kontra mi sin roson e ciu dimas.

²⁰ Kilis ku paga mal pa ben e sta kontra mi, pabia N pega na kil ki bon.

²¹ SIÑOR ña Deus, ka bu bandonan, nin ka bu lunjusi di mi.

²² Janti pa sakuran, SIÑOR ña Salbadur.